________________
१८८
श्रीदानोपदेशमाला (गा.२९) ततोऽसौ मूलदेवेन स्वपुत्रीं पर्यणाययत् । सप्ताहान्तनृपो भावीति स्वप्नफलमाह च ॥ १७७॥ श्रुत्वेति मुदितस्तत्र तिष्ठन् स्वप्नात् स सप्तमे । दिने पुराद् बहिर्गत्वा चम्पकद्रुतलेऽस्वपत् ॥ १७८ ॥ अथो रुजा प्रजापाले, तत्रापुत्रे दिवं गते ।। पुरोधसाऽध्यवास्यन्त पञ्च दिव्यानि मन्त्रिभिः ॥ १७९ ॥ तानि बम्भ्रम्यमाणानि, निरगुर्नगराद् बहिः । आगुश्च तत्र यत्रास्ति स भाग्यैकमहोदधिः ॥ १८० ॥ गजो गर्जारवं चक्रे हयो हेषितमातनोत् । श्वेतातपत्रं तन्मूर्ध्नि निराधारमवास्थित ॥ १८१ ॥ गङ्गातरङ्गचङ्गाभ्यां, चामराभ्यामवीज्यत । श्रीशातकुम्भकुम्भेनाभिषिक्तश्च स पुण्यवान् ॥ १८२॥ जाते जयजयारावे कुम्भी कुम्भस्थलोपरि । स्वयमारोप्य तं पुर्यां प्रावेशयदसंशयम् ॥ १८३॥ तदेति जगदे देव्या, व्योमसंस्थितया तया । नाम्ना विक्रमराजोऽयं, राजा देवप्रभावभाक् ॥ १८४ ।। यो दुष्टोऽस्य भुवो भर्तुः शासनं लङ्घयिष्यति । तमवश्यमहं छेत्स्यामीत्युक्त्वा सा तिरोदधे ॥ १८५ ॥ श्रुत्वेत्यमात्यसामन्तपौरैरादरपूर्वकम् । सिंहासने निविष्टस्यास्याभिषेको विनिर्ममे ॥ १८६॥ अढौक्यन्त च लावण्यपुण्याङ्गा अङ्गजा निजाः । चतुरास्तुरगाश्चापि सिन्धुरा नदबन्धुराः ॥ १८७॥ ऊचिरे च त्वमेवातः परमस्माकमीश्वरः। वयं च भवदादेशकारिणः किङ्करा इव ॥ १८८॥ तथा कथंचित् सत्पात्रदानभूमीरुहोऽमुना । भव्यभावाम्भसा सिक्तो यथेहापि फलेग्रहिः ॥ १८९॥
Jain Education International
For Personal & Private Use Only
www.jainelibrary.org
