________________
११०
श्रीदानोपदेशमाला (गा.११)
इतश्च ऋषभस्वामी, पुण्डरीकादिसाधुयुक् । भव्यान् प्रबोधयन् प्राप स्फटिकाचलचूलिकाम् ॥ २५४ ॥ देवैः समवसरणं सिंहासनयुतं कृतम् । भगवांस्तदलञ्चक्रे पूर्वाचलमिवार्यमा ॥ २५५ ।। तथास्थं वृषभं वीक्ष्य वनपालाः समागताः । चक्रिणं वर्धयाञ्चक्रुर्जिनागमनवार्तया ॥ २५६ ॥ तांश्च दानेन संतोष्य भरतः सपरिच्छदः । वन्दिन्तुं तातपादाब्जानगादष्टापदं नगम् ॥ २५७ ॥ संत्यज्य राज्यचिह्नानि कृत्वा तिस्रः प्रदक्षिणाः । जिनं नत्वोपविश्यापि सोऽशृणोद्धर्मदेशनाम् ॥ २५८ ॥ देशनान्ते मुनीन् भ्रातृन्, पुत्रान् पौत्रांश्च चक्रभृत् । विलोक्य प्रोल्लसत्प्रेमा चेतस्येवमचिन्तयत् ॥ २५९॥ बन्धून् विना भुज्यमाना, भोगा रोगोपमा मम । तदात्तराज्यदानेन पुनः संतोषयामि तान् ॥ २६० ॥ इति निश्चित्य भरतो निजान् भ्रातृन्निमन्त्रयन् । निषिद्ध: स्वामिना तस्थौ, स्तम्भयन्त्रितदन्तिवत् ॥ २६१ ।। यदमी मुनयः शान्ताः क्षान्ता दान्ता गतस्पृहाः । किं ते राज्येन कुर्वन्ति, सिद्धिसाम्राज्यलिप्सवः ॥ २६२ ॥ इति श्रुत्वा ततश्चक्री भोज्यादि मदुपाहृतम् । प्राणधाराय भोक्ष्यन्तेऽमी यताश्चिन्तयन्निदम् ॥ २६३ ॥ शकटानां पञ्चशतीं भृत्वा भोज्यै रसोत्तरैः । आनाय्य पूर्ववत्साधून् भ्रातृन् भक्त्या न्यमन्त्रयत् ॥ २६४॥ युग्मम् ॥ तदाह भगवान् राजन्! राजपिण्डं न कल्पते । भोक्तुं मुनिजनस्येति श्रुत्वा खेदमगान्नृपः ॥ २६५ ॥
Jain Education International
For Personal & Private Use Only
www.jainelibrary.org
