________________
भविस्सयत्तकन्वं
पुव्ववए दिवसंम्मि अट्ठहिं मासेहिं एत्थ लोएण । तं किं पि हु कायव्वं जेणंते सोक्खयं होइ ।।४।। पुवज्जियदव्वाइं जो भंजइ महिलिय व्व घरमज्झे । सो पुरिसनामधारी कह न वि लज्जेइ लोयम्मि ॥४५।। विढवेणं दव्वं जो न वि वियरेइ सयणमाईसु ।। पूरिसायारो य फूडं सो निवसइ महिलिया गेहे ॥४६॥ तम्हा सुवन्नभूमि गंतूणं अज्जिमो महादव्वं । जेण जणाणं मज्झे पुरिसत्ते पाविमो लीहं ।।४७|| जंपइ य बंधुदत्तो जुत्तं तुम्हेंहिं जंपियं एयं । एरिसयं पुव्वं चिय मज्झ वि हियए ट्ठियं चेव ॥४८॥ गतूण पिउसयासे पभणइ एवं च बंधुदत्तो वि। ताय ! अहं वच्चामो सुवनदीवम्मि दविणत्थं ।।४९|| धणवइणा वि य भणियं जुज्जइ वणियाण एरिसं काउं । किं तु तुमं एगो च्चिय अम्हं चक्खु इहं पुत्त ! ॥५०॥ देसंतरं च गरुयं सावायं तह य जलहिउत्तरणं । दविणं च अत्थि तुम्हं भुजंतं जं न नि?इ ।।५।। तह वि न मेल्हइ जाहे अइगाहं कह वि बंधुदत्तो वि । ताहे सोणन्नाओ पिउणा मायाएं किच्छेणं ॥५२॥ घोसावियं च नयरे सुवन्नदीवं च जो वयइ को वि । तस्साहं वट्टेमो सव्वेसु वि कज्जजाएसु ॥५३।। तं सोऊणं भणियं भविस्सदत्तेण बंधुदत्तस्स । जामि अहं चिय भाउय ! तुम्हं सत्थेग जइ भणह ।।५४।। तुहतणओ च्चिय सत्थो पभणइ विणएण बंधुदत्तो वि । जइ वच्चइ भाय ! तुमे ता मम सव्वं पि संपन्नं ।।५५।। जणओ भाया वणिओ जइ सत्थे होइ कह वि पुन्नेहिं । ता जाण विएसो वि हु नियगेहं नत्थि संदेहो ॥५६।। सव्वं पि कयं पिउणं दीवंतरजोगयं च सव्वेहि । पंचसयाण य सामी सत्थियपुरिसाण सो जाओ ।।५७।। भणिओ य बंधुदत्तो मायाए ठुविय सुट्ठ एगते । तह पुत्त ! करेज्ज तुमं भविस्सदत्तो जह न एइ ॥५८॥
Jain Educationa International
For Personal and Private Use Only
www.jainelibrary.org
