Page Text
________________
[१०६] एवं खलु समणाउसो मए धम्मे पन्नत्ते- इणमेव निग्गंथे पावयणे जाव अंतं करेति जस्स णं धम्मस्स निग्गंथी सिक्खाए उवट्ठिता विहरमाणी पुरा दिगिंछाए जाव उदिण्णकामजाता याव विहरेज्जा, सा य परक्कमेज्जा सा य परक्कममाणी पासेज्जा से जे इमे भवंति उग्गपुत्ता महामाया भोगपुत्ता महामाउया जाव किं भे आसगस्स सदति ? जं पासित्ताणं निग्गंथी निदानं करेति- दुक्खं खलु इत्थित्तणए, दुस्संचाराइं गामंतराई जाव सन्निवेसंतराई, से जहानामए अंबपेसियाति वा अंबाडगपेसियाति वा मातुलुंगपेसियाति वा मंसपेसियाति वा उच्छुखंडियाति वा संबलिफालियाति वा बहुजनस्स आसायणिज्जा पत्थणिज्जा विहणिज्जा अभिलसणिज्जा एवामेव इत्थिकावि बहुजनस्स आसायणिज्जा जाव अभिलसणिज्जा, तं दुक्खं खलु इत्थित्तणए, पुमत्तणए साहू,
जइ इमस्स सुचरियस्स तव नियम जाव अत्थि तं अहमवि आगमेस्साइं इमेयारूवाइं ओरालाई भोगभोगाइं भुंजिस्सामि, से त्तं साहुणी, एवं खलु समणाउसो ! निग्गंथी निदानं किच्चा तस्स ठाणस्स अनालोइयअपडिक्कंता कालमासे कालं किच्चा अन्नतरेसु देवलोगेसु देवत्ताए उववत्तारो भवति, महिड्ढिएसु जाव चिरट्ठितीएसु सा णं तत्थ देवे भवति - महिड्ढिए जाव चइत्ता से जे इमे भवंति उग्गपुत्ता तहेव दारए जाव किं भे आसगस्स सदति ? तस्स णं तहप्पगारस्स पुरिसजातस्स जाव अभवि णं से तस्स धम्मस्स सवणयाए से य भवइ- महिच्छे जाव दाहिणगामी नेरइए जाव दुल्लहबोहि भवति, एवं खलु जाव पडणेत्तए ।
[१०७] एवं खलु समणाउसो ! मए धम्मे पन्नत्ते- इणमेव निग्गंथे पावयणे जाव जस्स णं धम्मस्स निग्गंथे वा निग्गंथी वा सिक्खाए उवट्ठिए विहरमाणे पुरा दिगिंछाए जाव उदिण्ण कामभोगे याव विहरेज्जा, से य परक्कमेज्जा, से य परक्कममाणे माणुस्सेहिं कामभोगेहिं निव्वेयं गच्छेज्जा, माणुस्सगा खलु कामभोगा अधुवा अनितिया असासता सडण - पडण - विद्धंसणधम्मा उच्चार पासवण - खेल-सिंघाण-वंतपित्त-सुक्क-सोणिय समुब्भवा दुरुव-उस्सास - निस्सासा दुरुव-मुत्त-पुरीसपुन्ना वंतासवा पित्तासवा खेलासवा पच्छा पुरं च णं अवस्सं विप्पजहणिज्जा, संति उड्ढं देवा देवलोगंसि ते णं तत्थ अन्नेसिं देवाणं देवीओ अभिजुंजिय- अभिजुंजिय परियारेंति अप्पणो चेव अप्पाणं विउव्वित्ता - परियारेंति अप्पणि
दसा - १०
ज्जियाओ देवीओ अभिजुंजिय अभिजुंजिय परियारेंति, जति इमस्स सुचरियस्स तव नियम- बंभवेरवासस्स कल्लाणे फलवित्ति-विसेसे अत्थि तं अहमवि आगमेस्साइं इमाइं एतारूवाइं दिव्वाइं भोगभोगाई भुंजमाणे विहरामि - से त्तं साहू,
एवं खलु समणाउसो! निग्गंथे वा निग्गंथी वा निदानं किच्चा तस्स ठाणस्स अनालोइय अपडिक्कंते कालमासे कालं किच्चा अन्नतरेसु देवलोगेसु देवत्ताए उववत्तारो भवति- महिड्ड्ढएसु जाव चिरट्ठितीएसु, से णं तत्थ देवे भवति - महिड्ढिए जाव भुंजमाणे विहरति से णं तत्थ अन्नेसिं देवानं देवीओ पवियारेति, से णं ताओ देललोगाओ जाव किं भे आसगस्स सदति ? तस्स णं तहप्पगारस्स पुरिसजातस्स तहारूवे समणे वा माहणे वा जाव पडिसुणेज्जा ? हंता पडिसुणेज्जा, से णं भंते ! सद्दहेज्जा पत्तिएज्जा रोएज्जा ? नो इणट्ठे समट्ठे, अभविए णं से तस्स धम्मस्स सद्दहणयाए पत्तियाए रोयणाए, से य भवति महिच्छे जाव दाहिणगामिए नेरइए आगमेस्साए दुल्लहबोहिए यावि भवइ,
एवं खलु समणाउसो तस्स निदानस्स इमेतारूवे पावए फलविवागे जं नो संचाए केवलिपन्नत्तं धम्मं सद्दहित्तए वा पत्तइत्तए वा रोइत्तए वा ।
[ दीपरत्नसागर संशोधितः ]
[23]
Jain Education International
For Private & Personal Use Only
[ ३७-दसासुयक्खंधं ]
www.jainelibrary.org
| SR No. | 003773 |
| Book Title | Agam 37 Dasasuyakkhandam Chauttham Cheyasuttam Mulam PDF File |
| Original Sutra Author | N/A |
| Author | Dipratnasagar, Deepratnasagar |
| Publisher | Deepratnasagar |
| Publication Year | 2012 |
| Total Pages | 27 |
| Language | Prakrit |
| Classification | Book_Devnagari, Agam, Canon, Agam 37, & agam_dashashrutaskandh |
| File Size | 2 MB |