Page Text
________________
[१४०] कहि णं भंते जंबुद्दीवे दीवे महा विदेहे नामं वासे पन्नत्ते गोयमा नीलवंतस्स वासहरपव्वयस्स दक्खिणेणं निसहस्स वासहरपव्वयस्स उत्तरेणं पुरत्थिमलवण समुद्दस्स पच्चत्थिमेणं पच्चत्थिमलवणसमुदस्स पुरत्थिमेणं एत्थ णं जंबुद्दीवे दीवे महाविदेहे नामं वासे पन्नत्ते-पाईणपडीणायए उदीणदाहिणविच्छिण्णे पलियंकसंठाणसंठिए दुहा लवणसमुदं पुढे-पुरथिमिल्लाए जाव पुढे पच्चत्थमिल्लाए कोडीए पच्चत्थिमिल्लं लवणसमुदं पुढे तित्तीसं जोयणसहस्साई छच्च चुलसीए जोयणसए चत्तारि य एगूणवीसइभाए जोयणस्स विक्खंभेणं तस्स बाहा पुरत्थिमपच्चत्थिमेणं तेत्तीसं जोयणसहस्साई सत्त य सत्तसढे जोयणसए सत्त य एगूणवीसइभाए जोयणस्स आयामेणं तस्स जीवा बहुमज्झदेसभाए पाईणपडीणायया दुहा लवणसमुदं पुट्ठा-पुरथिमिल्लाए कोडीए पुरथिमिल्लं लवणसमुदं पुट्ठा एवं पच्चत्थिमिल्लाए जाव पुट्ठा एगं जोयण-सयसहस्सं आयामेणं तस्स धणुं धणुपढे उभओ पासिं उत्तरदाहिणेणं एगं जोयणसयसहस्सं अट्ठा-वण्णं जोयणसहस्साइं एगं च तेरसुत्तरं जोयणसयं सोलस य एगूणवीसइभागे जोयणस्स किंचिविसेसाहिए परिक्खेवेणं महाविदेहे णं वासे चउव्विहे चउप्पडोयारे पन्नत्ते
वक्खारो-४
जहा- पुव्वविदेहे अवरविदेहे देवकुरा उत्तरकुरा महाविदेहस्स णं भंते वासस्स केरिसए आगारभावपडोयारे पन्नत्ते गोयमा बहसमरमणिज्जे भूमिभागे पन्नत्ते जाव कत्तिमेहिं चेव अकत्तिमेहिं चेव महाविदेहे णं भंते वासे मणुयाणं केरिसए आगारभावपडोयारे पन्नत्ते गोयमा तेसि णं मणुयाणं छव्विहे संघयणे छव्विहे संठाणे पंचधणुसयाइं उड्ढं उच्चत्तेणं जहण्णेणं अंतोमुहुत्तं उक्कोसेणं पुव्वकोडी आउयं पालेंति पालेत्ता अप्पेगइया निरयगामी जाव अप्पेगइया सिझंति जाव अंतं करेंति से केणटेणं भंते एवं वुच्चइ-महाविदेहे वासे महाविदेह वासे गोयमा महाविदेहे णं वासे भरहेरवय-हेमवय-हेरण्णवय-हरिवास-रम्मगवासेहितो आयाम-विक्खंभ-संठाण-परिणाहेणं विच्छिण्णतराए चेव विपुलतराए चेव महंततराए चेव सुप्पमाणतराए चेव महाविदेहा यत्थ मणूसा परिवसंति महाविदेहे यत्थ देवे महिड्ढीए जाव पलिओवमट्ठिईए परिवसइ से तेणटेणं गोयमा एवं वुच्चइ-महाविदेहेवासे महाविदेहे वासे अदुत्तरं च णं गोयमा महाविदेहस्स वासस्स सासए नामधेज्जे पन्नत्ते-जं न कयाइ नासि न कयाइ नत्थि न कयाइ न भविस्सइ भुविं च भवइ य भविस्सइ य धुवे नियए सासए अक्खए अव्वए अवट्ठिए निच्चे ।
[१४१] कहि णं भंते महाविदेहे वासे गंधमायणे नामं वक्खारपव्वए पन्नत्ता गोयमा नीलवंतस्स वासहरपव्वयस्स दाहिणेणं मंदरस्स पव्वयस्स उत्तरपच्चत्थिमेणं गंधिलावइस्स विजयस्स पुरत्थिमेणं उत्तरकुराए पच्चत्थिमेणं एत्थ णं महाविदेहे वासे गंधमाणे नामं वक्खारपव्वए पन्नत्तेउत्तरदाहिणायए पाईणपडीणविच्छिण्णे तीसं जोयणसहस्साई दुण्णि य नउत्तरे जोयणसए छच्च य एगूणवीसइभाए जोयणस्स आयामेणं नीलवंतवासहरपव्वयंतेणं चत्तारि जोयणसयाई उड्ढं उच्चत्तेणं चत्तारि गाउयसयाइं उव्वेहेणं पंच जोयणसयाई विक्खंभेणं तयणंतरं च णं मायाए-मायाए उस्सेहववेहपरिवुड्ढीए परिवड्ढमाणे-परिवड्ढमाणे विक्खंभपरिहाणीए परिहायमाणे-परिहायमाणे मंदरपववयंतेणं पंच जोयणसयाई उड्ढं उच्चत्तेणं पंच गाउयसयाई उव्वेहेणं अंगुलस्स असंखेज्जइभागं विक्खंभेणं पन्नत्ते-गयदंतसंठाणसंठिए सव्वरयणामए अच्चे उभओ पासिं दोहिं पउम-वरवियाहिं दोहि य वणसंडेहिं सव्वओ समंता संपरिक्खित्ते गंधमायणस्स णं वक्खार-पव्वयस्स उप्पिं बहसमरमणिज्जे भूमिभागे जाव आसयंति, गंधमायणे णं वक्खारपव्वए कति कूडा पन्नत्ता गोयमा सत्त कूडा पन्नत्ता तं [दीपरत्नसागर संशोधितः]
[66]
[१८-जंबूद्दीवपन्नत्ति]
| SR No. | 003735 |
| Book Title | Agam 18 Jambudivpannatti Sattam Uvvangsuttam Mulam PDF File Without Correction |
| Original Sutra Author | N/A |
| Author | Dipratnasagar, Deepratnasagar |
| Publisher | Deepratnasagar |
| Publication Year | 2013 |
| Total Pages | 122 |
| Language | Prakrit |
| Classification | Book_Devnagari, Agam, Canon, Agam 18, & agam_jambudwipapragnapti |
| File Size | 2 MB |