Page Text
________________
निगिण्हत्ता रहं ठवेइ ठवेत्ता धणुं परामुसइ जाव उसु निसिरइ-परिगरणिगरियमज्झो वाउयद्धसोभामाणकोसेज्जो चित्तेणं सोभते धणुवरेणं इंदोव्व पच्चक्खं तं चंचलायमाणं पंचमिचंदोवमं महाचावं छज्जइ वामे हत्थे नरवइणो तंमि विजयंमि तए णं से सरे भरहेणं रण्णा निसटे समाणे खिप्पामेव दुवालस जोयणाइं गंता पभासतित्थाधिपतिस्स देवस्स भवणंसि निवइए ताए णं से पभासतित्थाहिवई देवे भवणंसि सरं निवइयं पासइ पासित्ता आसुरुते रुढे जाव एवं वयासी-केस णं भो एस अपत्थियपत्थए जे णं मम इमाए एयारूवाए दिव्वाए देवड्ढीए दिव्वाए देवजईए दिव्वेणं देवाणभेणं लद्धाए पत्ताए अभिसमण्णागयाए उप्पिं अप्पुस्सुए भवणंसि सरं निसिरइत्ति-कट्ट सीहासणाओ अब्भुढेइ अब्भुढेत्ता जेणेव से नामाहयके सरे तेणेव उवागच्छइ उवागच्छित्ता तं नामाहयकं सरं गेण्हइ गेण्हित्ता नामकं अनुप्पवाएइ नामकं अनुप्पवाएमाणस्स इमे एयारूवे० संकप्पे समुप्पज्जित्था-उप्पन्ने खलु भो जंबुद्दीवे दीवे भरहे वासे भरहे नामं राया चाउरंतचक्कवट्टी तं जीयमेयं तीयपच्चुप्पन्न-मणागयाणं पभासतित्थकुमाराणं देवाणं राईणमुवत्थाणियं करेत्तए तं गच्छामि णं अहंपि भरहस्स रण्मो उवत्थाणियं करेमित्तिकट्ट एवं संपेहेइ संपेहेत्ता मालं मउडि मत्ताजालं जाव पभासतित्थोदगं गेण्हड़ गेण्हित्ता ताए उक्किद्वाए तरियाए० वीइवयमाणे जेणेव भरहे राया तेणेव उवागच्छइ उवागच्छित्ता अंतलिक्ख-पडिवण्णे संखिखिणीयाइ पंचवण्णाई वत्थाई पवर परिहिए करयलपरिग्गहियं दसणहं सिरसावत्तं मत्थए अंजलिं कट्ट भरहं रायं जएणं विजएणं वद्धावेइ वद्धावेत्ता एवं वयासी-अभिजिए णं देवाणुप्पिएहिं केवलकप्पे भरहे वासे पच्चत्थिमिल्ले पभासतित्थमेराए तं अहण्णं देवाणुप्पियाणं विसयवासी अहण्णं देवाणुप्पियाणं आणत्तीकिंकरे अहण्णं देवाणुप्पियामं पच्चत्थिमिल्ले अंतवाले तं पडिच्छंतु णं देवाणुप्पिया ममं इमेयारूवं पीइदाणंतिकट्ठ मालं मउडि मुत्ताजालं जाव पभासतित्थोदगं च उवणेइ तए णं से भरहे राया पभासवक्खारो-३
तित्थकुमारस्स देवस्स इमेयारूवं पीइदामं पडिच्छइ पडिच्छित्ता पभासतित्थकुमारं देवं सक्कारेइ जाव पडिविसज्जेइ तए णं से भरहे राया रहं परावत्तेइ परावत्तेत्ता पभासतित्थेणं लवणसमुद्दाओ पच्चुतरह पच्चुत्तरित्ता जेणेव विजयखंधावारणिवेसे जेणेव बाहिरिया उवट्ठाणसाला तेणेव उवागच्छइ उवागच्छित्ता० जेणेव मज्जणधरे तेणेव उवागच्छइ जाव ससिव्व पियदंसणे नरवई मज्जणघराओ पडिणिक्खमइ पडिणिक्खमित्ता जेणेव भोयणमंडवे तेणेव उवागच्छइ० अट्ठमभत्तं पारेइ पारेत्ता भोयणमंडवाओ पडिणिक्खमइ पडिणिक्खमित्ता जेणेव बाहिरिया उवट्ठाणसाला जेणेव सीहासणे तेणेव उवागच्छइ उवागच्छित्ता सीहासणवरगए पुरत्थाभिमुहे निसीयइ नीसिइत्ता अट्टारस सेणि-प्पसेणीओ सद्धावेइ सद्धावेत्ता एवं वयासी खिप्पामेव भो देवाणुप्पिया उस्सुक्कं उक्करं उक्किट्ठे जाव अट्ठाहियं महामहिमं करेह करेत्ता मम एयमाणत्तियं पच्चप्पिणह तए णं ताओ अट्ठारस सेणि-प्पसेणीओ भरहेणं रण्णा एवं वुत्ताओ समाणीओ हद्वतुट्ठाओ जाव अट्ठाहियं महामहिमं करेंति करेत्ता एयमामत्तियं] पच्चप्पिणंति ।
[७४] तए णं से दिव्वे चक्करयणे पभासतित्थकुमारस्स देवस्स अट्टाहियाए महामहिमाए निव्वत्ताए समाणीए आउहधरसालाओ पडिणिक्खमइ पडिणिक्खमित्ता [अंतलिक्खपडिवण्णे जक्खसहस्ससंपरिवुडे दिव्वतुडियसद्दसण्णियादेणं] पूरतें चेव अंबरतलं सिंधूए महानईए दाहि-णिल्लेणं कूलेणं पुरत्थिमं दिसिं सिंधुदेवीभवणाभिमुहं पयाते यावि होत्था तए णं से भरहे राया तं दिव्वं चक्करयणं सिंधूए महाणईए दाहिणिल्लेणं कूलेणं पुरत्थिमं दिसिं सिंधुदेवीभवणाभिमुहं पयातं पासइ पासित्ता हद्वतुट्ठ-चित्तमाणंदिए तहेव जाव जेणेव सिंधूए देवीए भवणं तेणेव उवाच्छइ उवागच्छित्ता सिंधूए देवीए भवणस्स अदूरसामंते [दीपरत्नसागर संशोधितः]
[31]
[१८-जंबूद्दीवपन्नत्ति]
| SR No. | 003735 |
| Book Title | Agam 18 Jambudivpannatti Sattam Uvvangsuttam Mulam PDF File Without Correction |
| Original Sutra Author | N/A |
| Author | Dipratnasagar, Deepratnasagar |
| Publisher | Deepratnasagar |
| Publication Year | 2013 |
| Total Pages | 122 |
| Language | Prakrit |
| Classification | Book_Devnagari, Agam, Canon, Agam 18, & agam_jambudwipapragnapti |
| File Size | 2 MB |