Page Text
________________
एयारूवे अज्झत्थिए चिंतिए पत्थिए मणोगए संकप्पे समुप्पज्जित्था - उप्पन्ने खलु भो जंबुद्दीवे दीवे भर वासे भरहे नामं राया चाउरंतचक्कवट्टी तं जीयमेयं तीयपच्चुप्पन्नमणागयाणं वरदामतित्थकुमाराणं देवाणं राईणमुवत्थाणियं करेत्तए तं गच्छामि णं अहंपि भरहस्स रणो उवत्थाणियं करेमित्तिकट्टु एवं संपेहेइ संपेहेत्ता जूडामणिं च दिव्वं उरत्थगेविज्जगं सोणियसुत्तगं कडगाणि य तुडियाणि य वत्थाणि य आभरणाणि य सरं च नामाहयं वरदामतित्थोदगं गेण्हइ गेण्हित्ता ताए उक्किट्ठाए तुरियाए जाव वीईवयमाणे जेणेव भरहे राया तेणेव उवागच्छइ उवागच्छित्ता अंतलिक्खपडिवण्णे संखिखिणीयाइं पंचवण्णाइं वत्थाइं पवर परिहिए करयलपरिग्गहियं दसणहं सिरसावत्तं मत्थए अंजलिं कट्टु भरहं यं जएणं विजएणं वद्धावेइ वद्धावेत्ता एवं वयासी - अभिजिए णं देवाणुप्पिएहिं केवलकप्पे भरहे वासे दाहिणिल्ले वरदामतित्थमेराए तं अहण्णं देवाणुप्पियाणं विसयवासी अहण्णं देवाणुप्पियाणं आणत्ती - किंकरे अहणं देवाणुप्पियाणं दाहिणिल्ले अंतवाले तं पडिच्छंतु णं देवाणुप्पिया ममं इमेयारूवे पीइदाणंतिकट्टु चूडामणिं च दिवं उरत्थगेविज्जगं सोणियसुत्तगं कडगाणि य तुडियाणि य वत्थाणि य आभरणाणि य सरंचनामा वरदामतित्थोदगं च उवणेइ तए णं से भरहे राया वरदामतित्थकुमारस्स देवस्स इमेयारूवं पीइदाणं पडिच्छइ पडिच्छित्ता वरदामतित्थकुमारं देवं सक्कारेइ सम्माणेइ सक्कारेत्ता सम्माणेत्ता पडिविसज्जेइ तणं से भरहे राया रहं परावत्तेइ परावत्तेत्ता वरदामतित्थेणं लवणसमुद्दाओ पच्चुत्तरइ पच्चुत्तरिता जेणेव विजयखंधाबारणिवेसे जेणेव बाहिरिया उवट्ठाणसाला तेणेव उवागच्छइ उवागच्छित्ता तुरगे निगिण्ह निगिण्हित्ता रहं ठवेइ ठवेत्ता रहाओ पच्चोरुहति पच्चोरुहित्ता जेणेव मज्जणघरे तेणेव उवागच्छति उवागच्छित्ता मज्जणघरं अनुपविसइ अनुपविसित्ता जाव ससिव्व पियदंसणे नरवई मज्जणघराओ पडिणिक्खणइ पडिणिक्खमित्ता जेणेव भोयण
वक्खारो-३
मंडवे तेणेव उवागच्छइ उवागच्छित्ता भोयणमंडवंसि सुहासणवरगए अट्ठमभत्तं पारेइ पारेत्ता भोयणमंडवाओ पडिणिक्खमइ पडिणिक्खमित्ता जेणेव बाहिरिया उवट्ठाणसाला जेणेव सीहासणे तेणेव उवागच्छइ उवागच्छित्ता सीहासणवरगए पुरत्थाभिमुहे नीसीयइ निसीइत्ता अट्ठारस सेणिप्पसेणीओ सद्दावेइ सद्दावेत्ता एवं वयासी-खिप्पामेव भो देवाणुप्पिया उस्सुक्कं उक्करं उक्किट्ठे अदिज्जं अमिज्जं अडप्पवेसं अदंडकोदंडिमं अधरिमं गणियावरणाडइज्जकलियं अणेगतालायराणुचरियं अनुद्धुयमुइंगं अमिलायमल्लदामं पमुइयपक्कीलियसपुरजणजाणवयं विजयवेजइयं वरदामतित्थकुमारस्स देवस्स अट्ठाहियं महामहिमं कह करेत्ता मम एयमाणत्तियं पच्चप्पिणह तए णं ताओ अट्ठारस सेणिप्पसेणीओ भरहेणं रण्णा एवं वुत्ताओ समाणीओ ह्गुतुट्ठाओ जाव अट्ठाहियं माहमहिमं करेंति करेत्ता एयमाणत्तियं पच्चप्पिणंति तए णं से दिव्वे चक्करयणे वरदामतित्थकुमारस्स देवस्स अट्ठाहियाए महामहिमाए निव्वत्ताए समाणीए आउहघर - सालाओ पडिणिक्खमइ पडिणिक्खमित्ता अंतलिक्खपडिवण्णे [जक्खसहस्ससंपरिवुडे दिव्वतुडियसद्द-सण्णिणादेणं] पूरेंते चेव अंवरतलं उत्तरपच्चत्थिमं दिसिं पभासतित्थाभिमुहे पयाते यावि होत्था तए णं से भरहे राया तं दिव्वं चक्करयणं उत्तरपच्चत्थिमं दिसिं पभासतित्थाभिमुहं पयातं चावि पासइ पासित्ता तहेव जाव पच्चत्थिमदिसाभिमुहे पभासतित्थेणं लवणसमुद्दं ओगाहेइ जाव से रहवरस्स कुप्परा उल्ला जाव पीइदाणं से नवरं मालं मउडिं मुत्ताजालं हेमजालं कडगाणि य तुडियाणि य आभरणाणि य सरं च नामायं पभासतित्थोदगं च गिण्हइ त्ता जाव पच्चत्थिमेणं पभासतित्थमेराए अहण्णं देवाणुप्पियाणं विसवासी जाव पच्चत्थिमिल्ले अंतवाले सेसं तहेव जाव अट्ठाहिया निव्वत्ता [तए णं से भरहे राया तुरगे निगिण्हई [दीपरत्नसागर संशोधितः]
[30]
[१८-जंबूद्दीवपन्नत्ति]
| SR No. | 003735 |
| Book Title | Agam 18 Jambudivpannatti Sattam Uvvangsuttam Mulam PDF File Without Correction |
| Original Sutra Author | N/A |
| Author | Dipratnasagar, Deepratnasagar |
| Publisher | Deepratnasagar |
| Publication Year | 2013 |
| Total Pages | 122 |
| Language | Prakrit |
| Classification | Book_Devnagari, Agam, Canon, Agam 18, & agam_jambudwipapragnapti |
| File Size | 2 MB |