Page Text
________________
[३४४] चंदविमाणं भंते कइ देवसाहस्सीओ परिवहति गोयमा सोलस देवसाहस्सीओ परिवहंति-चंदविमाणस्स णं पुरत्थिमेणं सेयाणं सुभगाणं सुप्पभाणं संखतलविमलणिम्मलदहिघण-गोखीरफेण-रययणिगरप्पगासाणं थिरलट्ठपउट्ठ-वट्ट-पीवरसुसिलिट्ठविसिट्ठतिक्खदाढाविडंबियमुहाणं रत्तुप्पलपत्तमहुयसूमालतालुजीहाणं महुगुलियपिंगलक्खाणं पीवरवरोरुपडिपुन्नविलखंधाणं मिउविसयसुहुमलक्खणपसत्थवरवण्णकेसरसडोवसोहियाणं ऊसिय-सुणमिय-सुजाय-अप्फोडिय-णंगूलाणं वइरामयणक्खाणं वइरामयदाढाणं वइरामयदंताण तवणिज्जजीहाणं तवणिज्जतालुयाणं तवणिज्जजोत्तगसुजोइयाणं कामगमाणं पीइगमाणं मणोगमाणं मणोरमाणं अमियगईणं अमियबलवीरियपुरिसक्कारपरक्कमाणं महया अप्पोडिय-सीहणायबोलकलकलरवेणं महरेणं मणहरेणं पूरेता अंबरं दिसाओ य सोभयंता चत्तारि देवसाहस्सीओ सीहरूवधारीणं पुरथिमिल्लं बाहं परिवहति चंदविमाणस्स णं दाहिणेणं सेयाणं सुभगाणं सुप्पभाणं संखतल-विमल जाव गासाणं वइरामयकुंभजुयल-सुट्ठियपीवरवरवइरसोंडवट्टियदित्त
___ सुरत्तपउमपगासाणं-अब्भुण्णयमुहाणंतवणिज्जविसालकण्णचंचलचलंतविमलुज्जलाणं महवण्णभिसंतणिद्धपत्तलनिम्मलतिवण्ण-मणिरयणलोयणाणं अब्भुग्गयमउलमल्लियाधवलसरिससंठियनिवण्ण-दढ-कसिणफालियामय-सुजाय-दंत-मुसलोवसोभियाणं
कंचणकोसी-पविट्ठदंतग्गविमलमणिरयणरुइलपेरंतचित्तरूवगविराइयाणं
तवणिज्जविसा-लतिलगप्पम्हपरिमंडियाणं नाणामणिरयणमुद्ध-गेवेज्जबद्धगलयवरभूसणाणं वेरुलियविचित्तदंडनिम्मलवइरा-मयतिक्खलट्ठअंकुसकुंभजुयलयंतरोडियाणं तवणिज्जसुबद्धकच्छदप्पियबलुखुराणं विमलघणमंडलवइरामय-लालाललियतालणनाणामणिरयणघंटपासगरय-यामयबद्धरज्जुलंबियघंटाजुयलमहरसरमणहराणं
अल्लीणपमाणजुत्तवट्टियसुजायलक्खणपसत्थरमणिज्जबालगपत्तरिपुंछणाणं उवचियपडिपुन्नकुम्मचलणलहुविक्कमाणं अंकमयणक्खाणं तवणिज्जजीहाणं जाव कमाणं महया गंभीरगुलुगुलाइयरवेणं महुरेणं मणहरेणं पूरेता अंबरं दिसाओ य सोभयंता चत्तारि देवसाहस्सीओ गयरुवधारीणं देवाणं दक्खिणिल्लं बाहं परिवहति चंदविमाणस्स णं पच्चत्थिमेणं सेयाणं सुभगाणं सुप्पभाणं चलचवलककुहसालीणं धणणिचियसुबद्धलक्खणुण्णयईसिआ-यवसभोट्ठाणं चंकमियललियपुलियचलचवलगव्वियगईणं सण्णयपासाणं संगपासाणं सुजायपासाणं पीवर-वट्टियसुसंठियकडीणं ओलंबपलंबलक्खणपमाणजुत्तरमणिज्जवालगंडाणं समखुरवालिधाणाणं समलिहिय-सिंगतिक्खग्गसंगयाणं तणुसुहुमसुजायणिद्धोमच्छविधराणं
उवचियमंसलविसालपडिपुन्नखंधपएससुंदराणं वक्खारो-७
वेरुलियभिसंतकडक्खसुणिरिक्खाणाणं जुत्तपमाणपहाणलक्खणपसत्थरमणिज्जगग्गरगलसोभियाणं घरघरगसुसद्दबद्धकंठपरिमंडियाणं नाणामणिकणगरयणघंटियावेगच्छिगसुकयमालियाणं वरघंटागलयमालुज्जलसिरिधराणं पउमप्पलसगलसुरभिमालाविभूसियाणं वइरखुराणं विविहविक्खुराणं फालियामयदंताणं तवणिज्जजीहाणं जाव परक्कमाणं महया गज्जियगंभीररवेण महुरेणं मणहरेणं पूरेता अंबरं दिसाओ य सोभयंता चत्तारि देवसाहस्सीओ वसहरुवधारणी देवाणं पच्चत्थिमिल्लं बाहं परिवहति चंदविमाणस्स णं उत्तरेणं सेयाणं सुभगाणं सुप्पभाणं तरमल्लिहायणाणं हरिमेलामउल-मल्लियच्छाणं चंचुच्चियललियपुलियचलचवलचंचलगईणं लंघणवग्गणधावणधोरणतिवइ-जइण-सिक्खियगईणं ललंत-लाम-गललाय-वरभूसणाणं सण्णयपासाणं संगयपासाणं सुजाय-पासाणं पीवरवट्टियसुसंठियकडीणं ओलंबपलंबलक्खणपमाणजुत्तंरमणिज्जवालपुच्छाणं तणुसुहमसुजायणिद्धलोमच्छविहहराणं मिठविसयसुहुमलक्खणपसत्थविकिण्ण[दीपरत्नसागर संशोधितः]
[118]
[१८-जंबूद्दीवपन्नत्ति]
| SR No. | 003735 |
| Book Title | Agam 18 Jambudivpannatti Sattam Uvvangsuttam Mulam PDF File Without Correction |
| Original Sutra Author | N/A |
| Author | Dipratnasagar, Deepratnasagar |
| Publisher | Deepratnasagar |
| Publication Year | 2013 |
| Total Pages | 122 |
| Language | Prakrit |
| Classification | Book_Devnagari, Agam, Canon, Agam 18, & agam_jambudwipapragnapti |
| File Size | 2 MB |