________________
सतं-५, वग्गो- सत्तंसतं- , उद्देसो-७
[२५७]परमाणुपोग्गले णं भंते! कालतो केवच्चिरं होति? गोयमा! जहन्नेणं एगं समयं, उक्कोसेणं असंखेज्जं कालं।
एवं जाव अणंतपदेसिओ।
एगपदेसोगाढे णं भंते! पोग्गले सेए तम्मि वा ठाणे अन्नम्मि वा ठाणे कालओ केवचिरं होइ? गोयमा! जहन्नेणं एगं समयं, उक्कोसेणं आवलियाए असंखेज्जइभागं।
एवं जाव असंखेज्जपदेसोगाढे।
एगपदेसोगाढे णं भंते! पोग्गले निरेए कालओ केवचिरं होइ? गोयमा! जहन्नेणं एगं समयं, उक्कोसेणं असंखेज्जं कालं।
एवं जाव असंखेज्जपदेसोगाढे।
एगगुणकालए णं भंते! पोग्गले कालतो केवचिरं होइ? गोयमा! जहन्नेणं एगं समयं, उक्कोसेणं असंखेज्जं कालं।
एवं जाव अणंतगुणकालए। एवं वण्ण-गंध-रस-फास. जाव अणंतगुणलुक्खे। एवं सुहमपरिणए पोग्गले। एवं बादरपरिणए पोग्गले।
सद्दपरिणते णं भंते! पुग्गले कालओ केवचिरं होइ? गोयमा! जहन्नेणं एगं समयं उक्कोसेणं आवलियाए असंखेज्जइभागं।
असद्दपरिणते जहा एगगुणकालए।
परमाणुपोग्गलस्स णं भंते! अंतरं कालतो केवचिरं होइ? गोयमा! जहन्नेणं एगं समयं, उक्कोसेणं असंखेज्जं कालं।
दुप्पदेसियस्स णं भंते! खंधस्स अंतरं कालओ केवचिरं होइ? गोयमा! जहन्नेणं एगं समयं, उक्कोसेणं अणंतं कालं।
एवं जाव अणंतपदेसिओ।
एगपदेसोगाढस्स णं भंते! पोग्गलस्स सेयस्स अंतरं कालतो केवचिरं होइ? गोयमा! जहन्नेणं एग समयं, उक्कोसेणं असंखेज्जं कालं।
एवं जाव असंखेज्जपदेसोगाढे। एगपदेसोगाढस्स णं भंते! पोग्गलस्स निरेयस्स अंतरं कालतो केवचिरं होइ? गोयमा! जहन्नेणं एगं समयं, उक्कोसेणं आवलियाए असंखेज्जइभागं। एवं जाव असंखेज्जपएसोगाढे। वण्ण-गंध-रस-फास-सुहमपरिणय-बादरपरिणयाणं एतेसिं ज च्चेव संचिट्ठणा तं चेव अंतरं पि भाणियव्वं।
सद्दपरिणयस्स णं भंते! पोग्गलस्स अंतरं कालतो केवचिरं होइ? गोयमा! जहन्नेणं एगं समयं, उक्कोसेणं असंखेज्जं कालं।
असद्दपरिणयस्स णं भंते! पोग्गलस्स अंतरं कालओ केवचिरं होइ? गोयमा! जहन्नेणं एगं
[दीपरत्नसागर संशोधितः]
[94]
[५-भगवई
