________________
सतं-१७, वग्गो- ,सत्तंसत्तं- , उद्देसो-४
0 चउत्थो उद्देसो 0 [७०६] तेणं कालेणं तेणं समएणं जाव एवं वयासी-- अत्थि णं भंते! जीवाणं पाणातिवाएणं किरिया कज्जति? हंता, अत्थि।
सा भंते! किं पुट्ठा कज्जति, अपुट्ठा कज्जति? गोयमा! पुट्ठा कज्जति, नो अपुट्ठा कज्जति। एवं जहा पढमसए छठुद्देसए जाव नो अणाणुपुस्विकडा ति वत्तव्वं सिया।
एवं जाव वेमाणियाणं; नवरं जीवाणं एगिदियाण य निव्वाघाएणं छद्दिसिं; वाघायं पडुच्च सिय तिदिसिं सिय चउदिसिं सिय पंचदिसिं; सेसाणं नियमं छद्दिसिं।
अत्थि णं भंते! जीवाणं मुसावाएणं किरिया कज्जति? हंता, अत्थि। सा भंते! किं पुट्ठा कज्जति0? जहा पाणातिवाएणं दंडओ एवं मुसावातेण वि। एवं अदिण्णादाणेण वि, मेहणेण वि, परिग्गहेण वि। एवं एए पंच दंडगा।
जं समयं णं भंते! जीवाणं पाणातिवाएणं किरिया कज्जति सा भंते! किं पुट्ठा कज्जइ, अपुट्ठा कज्जइ? एवं तहेव जाव वत्तव्वं सिया। जाव वेमाणियाणं।
एवं जाव परिग्गहेणं। एते वि पंच दंडगा ।
जं देसं णं भंते! जीवाणं पाणातिवाएणं किरिया कज्जइ0? एवं चेव। जाव परिग्गहेणं। एवं एते वि पंच दंडगा।
जं पदेसं णं भंते! जीवाणं पाणातिवाएणं किरिया कज्जइ सा भंते! किं पुट्ठा कज्जइ0? एवं तहेव दंडओ।
एवं जाव परिग्गहेणं। एवं एए वीसं दंडगा।
[७०७] जीवाणं भंते! किं अत्तकडे दुक्खे, परकडे दुक्खे, तदुभयकडे दुक्खे? गोयमा! अत्तकडे दुक्खे, नो परकडे दुक्खे, नो तदुभयकडे दुक्खे।
एवं जाव वेमाणियाणं।
जीवा णं भंते! किं अत्तकडं दुक्खं वेदेति, परकडं दुक्खं वेदेति, तदुभयकडं दुक्खं वेदेति? गोयमा! अत्तकडं दुक्खं वेदेति, नो परकडं दुक्खं वेदेति, नो तदुभयकडं दुक्खं वेदेति।
एवं जाव वेमाणिया।
जीवाणं भंते! किं अत्तकडा वेयणा, परकडा वेयणाo? पुच्छा। गोयमा! अत्तकडा वेयणा, णो परकडा वेयणा,णो तद्भयकडा वेदणा।
एवं जाव वेमाणियाणं। जीवा णं भंते! किं अत्तकडं वेदणं वेदति, परकडं वेदणं वेदेति, तद्भयकडं
वेयणं वेदेति? गोयमा! जीवा अत्तकडं वेदणं वेदेति, नो परकडं वेयणं वेएंति, नो तदुभयकडं वेयणं वेएंति।
एवं जाव वेमाणिया। सेवं भंते! सेवं भंते! ति।
*सत्तरसमे सए चउत्थो उद्देसो समत्तो.
[दीपरत्नसागर संशोधितः]
[357]
[५-भगवई
