________________
सतं-१४, वग्गो - ,सत्तंसतं- , उद्देसो-५
एवं जाव थणियकुमारा।
पुढविकाइया छट्ठाणाई पच्चणुभवमाणा विहरंति, तं जहा- इट्ठाणिट्ठा फासा, इट्ठाणिट्ठा गती, एवं जाव परक्कमे।
एवं जाव वणस्सइकाइया।
बेइंदिया सत्त हाणाइं पच्चणुभवमाणा विहरंति, तं जहा- इट्ठाणिट्ठा रसा, सेसं जहा एगिंदियाणं।
तेइंदिया णं अट्ठ ट्ठाणाई पच्चणुभवमाणा विहरंति, तं जहा- इट्ठाणिट्ठा गंधा, सेसं जहा बेइंदियाणं।
चरिंदिया नव ट्ठाणाई पच्चणुभवमाणा विहरंति, तं जहा- इट्ठाणिट्ठा रूवा, सेसं जहा तेइंदियाणं।
पंचेंदियतिरिक्खजोणिया दस ट्ठाणाइं पच्चणुभवमाणा विहरंति, तं जहा- इट्ठाणिट्ठा सद्दा जाव परक्कमे।
एवं मणुस्सा वि। वाणमंतर-जोतिसिय-वेमाणिया जहा असुरकुमारा।
[६१४] देवे णं भंते! महिड्ढीए जाव महेसक्खे बाहिरए पोग्गले अपरियादिइत्ता पभू तिरियपव्वतं वा तिरियभितिं वा उल्लंघेत्तए वा पल्लंघेत्तए वा? गोयमा! नो इणटठे समटठे।
देवे णं भंते! महिड्ढीए जाव महेसक्खे बाहिरए पोग्गले परियादिइत्ता पभू तिरियप0 जाव पल्लंघेत्तए वा? हंता, पभू। सेवं भंते! सेवं भंते! ति।
*चोइसमे सए पंचमो उद्देसो समत्तो *
0 छट्ठो उद्देसओ 0 [६१५] रायगिहे जाव एवं वदासी
नेरतिया णं भंते! किमाहारा, किंपरिणामा, किंजोणीया, किंठितीया पन्नत्ता? गोयमा! नेरइया णं पोग्गलाहारा, पोग्गलपरिणामा, पोग्गलजोणीया, पोग्गलट्ठितीया, कम्मोवगा, कम्मनियाणा, कम्मट्टितीया, कम्मणा मेव विप्परियासमेंति।
एवं जाव वेमाणिया।
[६१६] नेरइया णं भंते! किं वीचिदव्वाइं आहारेंति, अवीचिदव्वाइं आहारेंति? गोयमा! नेरतिया वीचिदव्वाई पि आहारेंति, अवीचिदव्वाई पि आहारेंति।
से केणढेणं भंते! एवं वुच्चति 'नेरतिया वीचि0 तं चेव जाव आहारेंति'? गोयमा! जे णं नेरइया एगपदेसूणाई पि दव्वाइं आहारेंति ते णं नेरतिया वीचिदव्वाई आहारेंति, जे णं नेरतिया पडिपुण्णाई दव्वाइं आहारेति ते णं नेरइया अवीचिदव्वाई आहारेति। सेतेणठेणं गोयमा! एवं वुच्चति जाव आहारेंति।
एवं जाव वेमाणिया आहारेति । [६१७] जाहे णं भंते! सक्के देविंदे देवराया दिव्वाई भोगभोगाई भुंजिउकामे भवति से
[दीपरत्नसागर संशोधितः]
[304]
[५-भगवई
