Page Text
________________
सतं-१३, वग्गो- ,सत्तंसत्तं- , उद्देसो-४
[५७१] इमा णं भंते! रयणप्पभा पुढवी दोच्चं सक्करप्पभं पुढविं पणिहाए सव्वमहंतिया बाहल्लेणं, सव्वखुडिया सव्वंतेसु? एवं जहा जीवाभिगमे बितिए नेरइयउद्देसए।
[५७२] इमीसे णं भंते! रयणप्पभाए पुढवीए णिरयपरिसामंतेसु जे पुढविकाइया। एवं जहा नेरइयउद्देसए जाव अहेसत्तमाए।
[५७३] कहि णं भंते! लोगस्स आयाममज्झे पन्नते? गोयमा! इमीसे रयणप्पभाए पुढवीए ओवासंतरस्स असंखेज्जतिभागं ओगाहिता, एत्थ णं लोगस्स आयाममज्झे पण्णत्ते।
कहि भंते! अहेलोगस्स आयाममज्झे पन्नते? गोयमा! चउत्थीए पंकप्पभाए पुढवीए ओवासंतरस्स सातिरंगं अद्धं ओगाहित्ता, एत्थ णं अहेलोगस्स आयाममज्झे पन्नते।
कहि णं भंते! उड्ढलोगस्स आयाममज्झे पन्नते? गोयमा! उप्पिं सणंकुमार-माहिंदाणंकप्पाणं हेळिं बंभलोए कप्पे रिठे विमाणपत्थडे, एत्थ णं उड्ढलोगस्स आयाममज्झे पन्नते।
कहि णं भंते! तिरियलोगस्स आयाममज्झे पन्नते? गोयमा! जंबुद्दीवे दीवे मंदरस्स पव्वयस्स बह्मज्झदेसभाए इमीसे रयणप्पभाए पुढवीए उवरिमहेट्ठिल्लेसु खुड्ग पयरेसु, एत्थ णं तिरियलोगमज्झे अठ्ठपएसिए रुयए पन्नते, जओ णं इमाओ दस दिसाओ पवहंति, तं जहा-पुरत्थिमा पुरत्थिमदाहिणा एवं जहा दसमसते जाव नामधेज्ज ति।
इंदा अग्गेयी जमा य नेरई वारुणी य वायव्वा
सोमा ईसाणी या विमला य तमा य बोद्धव्वा [५७४] इंदा णं भंते! दिसा किमादीया किंपवहा कतिपदेसादीया कतिपदेसुत्तरा कतिपदेसिया किंपज्जवसिया किंसंठिया पन्नता? गोयमा! इंदा णं दिसा रूयगादीया रुयगप्पवहा दुपदेसादीया दुपदेसुत्तरा, लोगं पडुच्च असंखेज्जपएसिया, अलोगं पडुच्च अणंतपदेसिया, लोगं पडुच्च सादीया सपज्जवसिया, अलोगं पडुच्च सादीया अपज्जवसिया, लोगं पडुच्च मुरवसंठिया, अलोगं पडुच्च सगडुद्धिसंठिता पन्नता।
अग्गेयी णं भंते! दिसा किमादीया किंपवहा कतिपएसादीया कतिपएसवित्थिण्णा कतिपदेसिया किंपज्जवसिया किंसंठिया पन्नता? गोयमा! अग्गेयी णं दिसा रुयगादीया रुयगप्पवहा एगपएसादीया एगपएसवित्थिण्णा अणुतरा, लोगं पडुच्च असंखेज्जपएसिया, अलोगं पडुच्च अणंतपएसिया, लोगं पडुच्च सादीया सपज्जवसिया, अलोगं पडुच्च सादीया अपज्जवसिया, छिन्नमुत्तावलिसंठिया पन्नता।
जमा जहा इंदा। नेरती जहा अग्गेयी। एवं जहा इंदा तहा दिसाओ चत्तारि वि। जहा अग्गेयी तहा चत्तारि वि विदिसाओ।
विमला णं भंते! दिसा किमादीया, पुच्छा। गोयमा! विमला णं दिसा रुयगादीया रुयगप पवहा चठप्पएसादीया, दुपदेसवित्थिण्णा अणुत्तरा, लोगं पडुच्च0 सेसं जहा अग्गेयीए, नवरं रुयगसंठिया पन्नत्ता।
एवं तमा वि।
[५७५] किमियं भंते! लोए ति पवुच्चइ? गोयमा! पंचत्थिकाया, एस णं एवतिए लोए ति पवुच्चइ, तं जहा--धम्मऽत्थिकाए, अधम्मऽत्थिकाए, जाव पोग्गलऽत्थिकाए।
धम्मऽत्थिकाए णं भंते! जीवाणं किं पवत्तति? गोयमा! धम्मऽत्थिकाए णं जीवाणं आगमण
[दीपरत्नसागर संशोधितः]
[284]
[५-भगवई
| SR No. | 003709 |
| Book Title | Agam 05 Bhagavai Panchamam Angsuttam Mulam PDF File |
| Original Sutra Author | N/A |
| Author | Dipratnasagar, Deepratnasagar |
| Publisher | Deepratnasagar |
| Publication Year | 2012 |
| Total Pages | 565 |
| Language | Prakrit |
| Classification | Book_Devnagari, Agam, Canon, Agam 05, & agam_bhagwati |
| File Size | 5 MB |