Page Text
________________
सतं-१२, वग्गो - ,सत्तंसत्तं- , उद्देसो-६
"जदा णं राहू आगच्छमाणे वा जाव परियारेमाणे वा चंदलेस्सं अहे सपक्खिं सपडिदिसिं आवरेत्ताणं चिटठति तदा णं मणस्सलोए मणुस्सा वदंति--एवं खलु राहणा चदे घर घत्थे।"
कतिविधे णं भंते! राहू पन्नते? गोयमा! दुविहे राहू पन्नते, तं जहा--धुवराहू य पव्वराहू य। तत्थ णं जे से धुवराहू से गं बलपक्खस्स पाडिवए पन्नरसतिभागेणं पन्नरसतिभागं चंदस्स लेस्सं आवरेमाणे आवरेमाणे चिट्ठति, तं जहा--पढमाए पढमं भागं, बितियाए बितियं भागं जाव पन्नरसेस पन्नरसमं भाग। चरिमसमये चंदे रते भवति, अवसेसे समये चंदे रते वा विरते वा भवति। तमेव सुक्कपक्खस्स उवदंसेमाणे चिट्ठइ-पढमाए पढमं भागं जाव पन्नरसेसु पन्नरसमं भागं चरिमसमये चंदे विरते भवइ, अवसेसे समये चंदे रते य विरते य भवइ। तत्थ णं जे से पव्वराहू से जहन्नेणं छण्हं मासाणं; उक्कोसेणं बायालीसाए मासाणं चंदस्स, अडयालीसाए संवच्छराणं सूरस्स।
[५४७] से केणठेणं भंते! एवं वुच्चइ 'चंदे ससी, चंदे ससी'? गोयमा! चंदस्स णं जोतिसिंदस्स जोतिसरण्णो मियंके विमाणे, कंता देवा, कंताओ देवीओ, कंताई आसण-सयण-खंभभंडमत्तोवगरणाई, अप्पणा वि य णं चंदे जोतिसिंदे जोतिसराया सोमे कंते सुभए पियदंसणे सुरूवे, सेतेणढेणं जाव ससी।
[५४८] से केणढेणं भंते! एवं वुच्चइ सूरे अदिच्चे, सूरे आदिच्चे'? गोयमा! सूरादीया णं समया इ वा आवलिया इ वा जाव ओसप्पिणी इ वा, उस्सप्पिणी इ वा। सेतेणढेणं जाव आदिच्चे।
[५४९] चंदस्स णं भंते! जोतिसिंदस्स जोतिसरण्णो कति अग्गमहिसीओ पन्नताओ? जहा दसमसए जाव णो चेव णं मेणवत्तियं।
सूरस्स वि तहेव।
चंदिम-सूरिया णं भंते! जोतिसिंदा जोतिसरायाणो केरिसए कामभोगे पच्चणुभवमाणा विहरंति? गोयमा! से जहानामए केइ पुरिसे पढमजोव्वणुट्ठाणबलत्थे पढमजोव्वणुट्ठाणबलत्थाए भारियाए सद्धिं अचिरवत्तविवाहकज्जे अत्थगवेसणाए सोलसवासविप्पवासिए, से णं तओ लद्धढे कयकज्जे अणहसमग्गे पुणरवि नियगं गिहं हव्वमागते पहाते कयबलिकम्मे कयकोठयमंगलपायच्छित्ते सव्वालंकारविभूसिए मणुण्णं थालिपागसुद्धं अट्ठारसवंजणाकुलं भोयणं भुते समाणे तंसि तारिसगंसि वासघरंसि; वण्णओ0 महब्बले जाव सयणोवयारकलिए ताए तारिसियाए भारियाए सिंगारागारचारुवेसाए जाव कलियाए अणुरत्ताए अविरत्ताए मणाणुकूलाए सद्धिं इठे सद्दे फरिसे जाव पंचविहे माणुस्सए कामभोगे पच्चणुभवमाणे विहरेज्जा, से णं गोयमा! पुरिसे विओसमणकालसमयंसि केरिसयं सातासोक्खं पच्चणुभवमाणे विहरति? 'ओरालं समणाउसो!' तस्स णं गोयमा! पुरिसस्स कामभोएहिंतो वाणमंतराणं देवाणं एतो अणंतगुणविसिट्ठतरा चेव कामभोगा। वाणमंतराणं देवाणं कामभोगेहिंतो असुरिंदवज्जियाणं भवणवासीणं देवाणं एतो अणंतगुणविसिट्ठतरा चेव कामभोगा। असुरिंदवज्जियाणं भवणवासियाणं देवाणं कामभोगेहिंतो असुरकुमाराणं [इंदभूयाणं] देवाणं एत्तो अणंतगुणविसिट्ठतरा चेव कामभोगा। असुरकुमाराणं0 देवाणं कामभोगेहिंतो गहगणनक्खत्त-तारारूवाणं जोतिसियाणं देवाणं एतो अणंतगुणविसिट्ठतरा चेव कामभोगा। गहगण-नक्खत्त जाव कामभोगेहिंतो चंदिम-सूरियाणं जोतिसियाणं जोतिसराईणं एतो अणंतगुणविसिट्ठतरा चेव कामभोगा। चंदिम-सूरिया णं गोतमा! जोतिसिंदा जोतिसरायाणो एरिसे [दीपरत्नसागर संशोधितः]
[267]
[५-भगवई]
| SR No. | 003709 |
| Book Title | Agam 05 Bhagavai Panchamam Angsuttam Mulam PDF File |
| Original Sutra Author | N/A |
| Author | Dipratnasagar, Deepratnasagar |
| Publisher | Deepratnasagar |
| Publication Year | 2012 |
| Total Pages | 565 |
| Language | Prakrit |
| Classification | Book_Devnagari, Agam, Canon, Agam 05, & agam_bhagwati |
| File Size | 5 MB |