Page Text
________________
सतं-८, वग्गो - ,सत्तंसत्तं- , उद्देसो-९
ताहे से पएसा एगत्तीगया भवंति ति। से तं पइप्पन्नप्पयोगपच्चइए। से तं सरीरबंधे।
से किं तं सरीरप्पयोगबंधे? सरीरप्पयोगबंधे पंचविहे पन्नते, तं जहा-ओरालियसरीरप्पओगबंधे वेठव्वियसरीरप्पओगबंधे आहारगसरीरप्पओगबंधे तेयासरीरप्पयोगबंधे कम्मासरीरप्पयोगबंधे।
ओरालियसरीरप्पयोगबंधे णं भंते! कतिविहे पन्नते? गोयमा! पंचविहे पन्नते, तं जहाएगिंदियओरालियसरीरप्पयोगबंधे बेइंदियओरालियसरीरप्पयोगबंधे जाव पंचिंदियओरालियसरीरप्पयोगबंधे।
एगिदियओरालियसरीरप्पयोगबंधे णं भंते! कतिविहे पण्णते? गोयमा! पंचविहे पण्णते, तं जहा-पुढविक्काइयएगिंदियओरालियसरीरप्पयोगबंधे, एवं एएणं अभिलावेणं भेदा जहा ओगाहणसंठाणे ओरालियसरीरस्स तहा भाणियव्वा जाव पज्जत्तगब्भवक्कंतियमणुस्सपंचिंदियओरालियसरीरप्पयोगबंधे य अपज्जत्तगब्भवक्कंतियमणूसपंचिंदियओरालियसरीरप्पयोगबंधे य।
ओरालियसरीरप्पयोगबंधे णं भंते! कस्स कम्मस्स उदएणं? गोयमा! वीरियसजोगसद्दव्वयाए पमादपच्चया कम्मं च जोगं च भवं च आउयं च पइच्च ओरालियसरीरप्पयोगनामाए कम्मस्स उदएणं ओरालियसरीरप्पयोगबंधे।
एगिंदियओरालियसरीरप्पयोगबंधे णं भंते! कस्स कम्मस्स उदएणं? एवं चेव। पुढविक्काइयएगिंदियओरालियसरीरप्पयोगबंधे एवं चेव। एवं जाव वणस्सइकाइया। एवं बेइंदिया। एवं तेइंदिया। एवं चरिंदिया। तिरिक्खजोणियपंचिंदियओरालियसरीरप्पयोगबंधे णं भंते! कस्स कम्मस्स उदएणं? एवं चेव।
मणुस्सपंचिंदियओरालियसरीरप्पयोगबंधे णं भंते! कस्स कम्मस्स उदएणं? गोयमा! वीरियसजोगसद्दव्वयाए पमादपच्चया जाव आउयं च पडुच्च मणुस्सपंचिंदियओरालियसरीरप्पयोगनामाए कम्मस्स उदएणं मणुस्सपंचिंदियओरालियसरीरप्पओगबंधे।
ओरालियसरीरप्पयोगबंधे णं भंते! किं देसबंधे, सव्वबंधे? गोयमा! देसबंधे वि सव्वबंधे वि। एगिंदियओरालियसरीरप्पयोगबंधे णं भंते! किं देसबंधे, सव्वबंधे? एवं चेव। एवं पुढविकाइया।
एवं जाव मणुस्सपंचिंदियओरालियसरीरप्पयोगबंधे णं भंते! किं देसबंधे, सव्वबंधे? गोयमा! देसबंधे वि, सव्वबंधे वि।
ओरालियसरीरप्पयोगबंधे णं भंते! कालओ केवच्चिरं होइ? गोयमा! सव्वबंधे एक्कं समयं; देसबंधे जहन्नेणं एक्कं समयं, उक्कोसेणं तिण्णि पलिओवमाइं समयूणाई।
एगिंदियओरालियसरीरप्पयोगबंधे णं भंते! कालओ केवच्चिरं होइ? गोयमा! सव्वबंधे एक्कं समयं; देसबंधे जहन्नेणं एक्कं समयं, उक्कोसेणं बावीसं वाससहस्साई समऊणाई।
पुढविकाइयएगिंदिय. पुच्छा। गोयमा! सव्वबंधे एक्कं समयं, देसबंधे जहन्नेणं खुड्डाग भवग्गहणं तिसमयूणं, उक्कोसेणं बावीसं वाससहस्साई समऊणाई।
एवं सव्वेसिं सव्वबंधो एक्कं समयं, देसबंधो जेसि नत्थि वेठव्वियसरीरं तेसिं जहन्नेणं खुड्डागं भवग्गहणं तिसमयूणं, उक्कोसेणं जा जस्स उक्कोसिया ठिती सा समऊणा कायव्वा। जेसिं पुण अत्थि वेठब्वियसरीरं तेसिं देसबंधो जहन्नेणं एक्कं समयं, उक्कोसेणं जा जस्स ठिती सा समऊणा कायव्वा जाव मणुस्साणं देसबंधे जहन्नेणं एक्कं समयं, उक्कोसेणं तिण्णि पलिओवमाई समयूणाई।
[दीपरत्नसागर संशोधितः]
[173]
[५-भगवई
| SR No. | 003709 |
| Book Title | Agam 05 Bhagavai Panchamam Angsuttam Mulam PDF File |
| Original Sutra Author | N/A |
| Author | Dipratnasagar, Deepratnasagar |
| Publisher | Deepratnasagar |
| Publication Year | 2012 |
| Total Pages | 565 |
| Language | Prakrit |
| Classification | Book_Devnagari, Agam, Canon, Agam 05, & agam_bhagwati |
| File Size | 5 MB |