Page Text
________________
सतं-८, वग्गो - ,सत्तंसत्तं- , उद्देसो-८
अंतो णं भंते! माणुसुत्तरस्स पव्वयस्स जे चंदिम-सूरिय-गहगणणक्खत्त-तारारूवा ते णं भंते! देवा किं उड्ढोववन्नगा? जहा जीवाभिगमे तहेव निरवसेसं जाव उक्कोसेणं छम्मासा।
बहिया णं भंते! माणुसुत्तरस्स. जहा जीवाभिगमे जाव इंदट्ठाणे णं भंते! केवतियं कालं उववाएणं विरहिए पन्नते? गोयमा! जहन्नेणं एक्कं समयं, उक्कोसेणं छम्मासा। सेवं भंते! सेवं भंते! ति.।
अट्ठम सए अट्ठमो उद्देसो समतो.
0 नवमो उद्देसो0 [४२२] कइविहे णं भंते! बंधे पण्णते? गोयमा! दुविहे बंधे पण्णते, तं जहा-पयोगबंधे य, वीससाबंधे य।
[४२३] वीससाबंधे णं भंते! कतिविहे पण्णत्ते? गोयमा! दुविहे पण्णते, तं जहा-साईयवीससा बंधे य अणाईयवीससाबंधे य।
अणाईयवीससाबंधे णं भंते! कतिविहे पण्णत्ते? गोयमा! तिविहे पण्णत्ते, तं जहा-धम्मत्थिकायअन्नमन्नअणादीयवीससाबंधे अधम्मत्थिकायअन्नमन्नअणादीयवीससाबंधे, आगासत्थिकाय-अन्नमन्न अणादीयवीससाबंधे।
धम्मत्थिकायअन्नमन्नअणादीयवीससाबंधे णं भंते! किं देसबंधे सव्वबंधे? गोयमा! देसबंधे, नो सव्वबंधे।
एवं अधम्मत्थिकाय-अन्नमन्न-अणादीय-वीससाबंधे वि, एवं आगासत्थिकाय-अन्नमन्नअणादीय वीससाबंधे वि।
धम्मत्थिकायअन्नमन्नअणाईयवीससाबंधे णं भंते! कालओ केवच्चिरं होइ? गोयमा! सव्वद्धं । एवं अधम्मत्थिकाए, एवं आगासत्थिकाये।
सादीयवीससाबंधे णं भंते! कतिविहे पण्णते? गोयमा! तिविहे पण्णत्ते, तं जहा-बंधणपच्चइए भायणपच्चइए परिणामपच्चइए।
से किं तं बंधणपच्चइए? बंधणपच्चइए, जं णं परमाणुपुग्गल-दुपएसिय-तिपएसिय-जावदसपएसिय-संखेज्जपएसिय-असंखेज्जपएसिय-अणंतपएसियाणं खंधाणं वेमायनिद्धयाए वेमायलुक्खयाए वेमायनिद्ध-लुक्खयाए बंधणपच्चएणं बंधे समुप्पज्जइ जहन्नेणं एक्कं समयं, उक्कोसेणं
असंखेज्जं कालं। से तं बंधणपच्चइए।
से किं तं भायणपच्चइए? भायणपच्चइए, जं णं जुण्णसुरा-जुण्णगुल-जुण्णतंदुलाणं भायणपच्चएणं बंधे समुप्पज्जइ जहन्नेणं अंतोमुहत्तं, उक्कोसेणं संखेज्जं कालं। से तं भायणपच्चइए।
से किं तं परिणामपच्चइए ? परिणामपच्चइए, जं णं अब्भाणं अब्भरुक्खाणं जहा ततियसए जाव अमोहाणं परिणामपच्चएणं बंधे समुप्पज्जइ जहन्नेणं एक्कं समयं, उक्कोसेणं छम्मासा। से तं परि - णाम पच्चइए। से तं सादीयवीससाबंधे। से तं वीससाबंधे।
[४२४] से किं तं पयोगबंधे? पयोगबंधे तिविहे पण्णते, तं जहा-अणाईए वा अपज्जवसिए, सादीए वा अपज्जवसिए, सादीए वा सपज्जवसिए। तत्थ णं जे से अणाईए अपज्जवसिए से णं अट्ठण्हं
[दीपरत्नसागर संशोधितः]
[171]
[५-भगवई
| SR No. | 003709 |
| Book Title | Agam 05 Bhagavai Panchamam Angsuttam Mulam PDF File |
| Original Sutra Author | N/A |
| Author | Dipratnasagar, Deepratnasagar |
| Publisher | Deepratnasagar |
| Publication Year | 2012 |
| Total Pages | 565 |
| Language | Prakrit |
| Classification | Book_Devnagari, Agam, Canon, Agam 05, & agam_bhagwati |
| File Size | 5 MB |