________________
प्रथम अध्ययन : गाथापति आनन्द]
. [२३ मेहुणे परिग्गहे। अत्थि कोहे, माणे, माया, लोभे जाव (पेज्जे, दोसे, कलहे, अब्भक्खाणे, पेसुन्ने, परपरिवाए अरइरई, मायामोसे,) मिच्छा-दसण-सल्ले, अत्थि पाणाइवाय-वेरमणे, मुसावाय-वेरमणे, अदिण्णादाण-वेरमणे, मेहुण-वेरमणे, परिग्गह-वेरमणे जाव मिच्छादंसण-सल्ल-विवेगे। सव्वं अत्थिभावं अत्थित्ति वयति, सव्वं णत्थि-भावं णस्थित्ति वयति, सुचिण्णा कम्मा सुचिण्ण-फला भवंति, दुच्चिण्णा कम्मा दुच्चिण्णफला भवंति, फुसइ पुण्ण-पावे, पच्चायंति जीवा, सफले कल्लाण-पावए।
धम्ममाइक्खइ-इणमेव निग्गंथे पावयणे सच्चे, अणुत्तरे, के वलिए, संसुद्धे, पडिपुण्णे, णेयाउए, सल्लकत्तणे, सिद्धिमग्गे, मुत्तिमग्गे णिजाणमग्गे, णिव्वाणमग्गे, अवितहमविसंधि सव्वदुक्ख-प्पहीण-मग्गे। इहट्ठिया जीवा सिझंति बुज्झंति मुच्चंति परिणिव्वायंति सव्वदुक्खाणमंतं करेति। एगच्चा पुण एगे भयंतारो पुव्व-कम्मावसेसेण अण्णयरेसु देवलोएसु देवत्ताए उववत्तारो भवंति, महिड्डिएसु जाव महासुक्खेसु दूरंगइएस चिरट्ठिइएसु। तेणं तत्थ देवा भवंति महिड्डिया जाव चिरट्ठिइया हार-विराइयवच्छा जाव पभासेमाणा, कप्पोवगा गतिकल्लाणा ठिइकल्लाणा आगमेसि भद्दा जाव पडिरूवा तमाइक्खइ।
एवं खलु चउहि ठाणेहिं जीवा णेरइयत्ताए कम्मं पकरेंति, णेरइयत्ताए कम्म पकरेत्ता रइएसु उववजति, तं जहा महारंभयाए, महापरिग्गहयाए, पंचिंदियवहेणं, कुणिमाहारेणं। एवं एएणं अभिलावेणं तिरिक्ख-जोणिएसु माइल्लयाए, णियडिल्लयाए, अलिय-वयणेणं, उक्कंचणाए, वंचणयाए। मणुस्सेसु पगइभद्दयाए, पगइविणीययाए, साणुक्कोसयाए अमच्छरियाए। देवेसु सरागसंजमेणं, संजमासंजमेण, अकामणिज्जराए, बालतवो-कम्मेणं। तमाइक्खइ--
जह णरगा गम्मंति, जे णरगा जाय-वेयणा णरए। सारीर-माणसाइं, दुक्खाइं तिरिक्खजोणीए॥ माणुस्संच अणिच्चं, वाहि-जरा-मरण-वेयणा-पउरं। देवे य देवलोए, देवढेि देव-सोक्खाई॥ णरगं तिरिक्खजोणिं माणुसभावं च देवलोगं च। सिद्धे य सिद्ध-वसहिं , छज्जीवणियं परिकहे इ॥ जह जीवा बझंति, मुच्चंति जह य परिकिलिस्संति। जह दुक्खाणं अंतं, करेंति केई य अपडिबद्धा॥ अट्ट-दुहट्टिय-चित्ता, जह जीवा दुक्ख-सागरमुवेंति।
