________________
अगडदत्त
निद्दा-खए व्व बुद्धा अत्ताणं संवरेवि पसयच्छी । कयरो इमो पएसो पुच्छन्ती उट्ठिया झत्ति ॥ २७५ ॥ तं खयराणं जुयलं उडावेऊण पणइणिं तस्स । जंपिय कुमरेण समं उप्पइयं गयण-मग्गंमि ॥ २७६ ॥ कुमरो वि पिया-सहिओ रयणीए अइतमन्ध-पउराए । पच्चासन्ने देवय-उलंमि सहस चिय गओ त्ति ॥ २७७ ॥ कुमरेण एत्थ समए भणिया दइया पसन्न-वयणेणं । आणेमि जाव जलणं ताव तुम चिट्ट खणमेगं ॥२७८।। एवं भणिऊण गओ जलणं गहिऊण पुनरवि नियत्तो । ता पेच्छइ देवउले उज्जोय मण-चमक्कारं ॥२७९॥ संपत्तेणं तेणं भणिया सासङ्क-माणसेणेवं । अज्जे दीवुज्जोओ दिट्ठो मे आसि देवउले ॥२८॥ तीए वि य पडिभणियं पिय तुह हत्थ-ट्टियस्स जलणस्स । जलियस समुज्जोओ संकन्तो सो तुमे दिट्ठो ॥२८१॥ एत्यन्तरंमि खग्गं भज्जाए समप्पिऊण सो कुमरो । महि-निहिय-जाणु-जुयलो अहोमुहो धमइ जा जलणं ॥२८२॥ ता सहस च्चिय तीए खग्गं हत्थाओ कोस-परिहीणं । अइगरुय-निहाएणं पडियं देवउल-सिल-पट्टे ॥२८३॥ संभन्तो ता पुच्छइ निय-दइयं सो हु सरल-सब्भावो । किं कोस-विप्पमुक्कं खग्गं पडियं महियलंमि ॥२८४॥ तीए वि तओ भणिओ मह मण-मोहो अईव उच्छलिओ। तेणं परव्वसाए करवालं नवरि पडियं ति ॥२८॥ जाले वि तओ जलणं देवउले वोलिऊण सा रयणी । गोसंमि नियय-भवणे गयाइ साणन्द-हिययाई ॥२८६॥ बन्धव-सहि-सयणाणं रयाण-पउत्ती य निव्विसेसा सा । पिय-सहिएणं कहिया रहस-वसुल्लसिय-हियएणं ॥२८७॥ एवं च ताण दोण्ह वि हियय-समीहिय-विलास-सत्ताणं । वुच्चइ सुहेण कालो विसय-सुहं सेवमाणाणं ॥२८॥
Jain Education International
For Private & Personal Use Only
www.jainelibrary.org
