Page Text
________________
५४
विपाकश्रुताङ्गसूत्रम् १/९/३३
कालं किच्चा छट्टीए पुढवीए उक्कोसेणं बावीससागरोवमाइं ठितिएसु उववन्ने, से णं तओ अनंतरं उव्वट्टित्ता इहेव रोहीडए नगरे दत्तस्स सत्थवाहस्स कन्नसिरिए भारियाए दारियत्ताए उववन्ने, तते णं सा कन्नसिरी नवण्हं मासाणं जाव दारियं पयाया सुकुमाल० सुरूवं ।
तते णंतीसे दारियाए अम्मापियरो निव्वित्तबारसाहियाए विउलं असणं ४ जाव मित्तनाति० नामधेज्जं करेति तं होऊ णं दारिया देवदत्ता नामेणं, तए णंसा देवदत्ता पंचधातीपरिगहिया जाव परिवड्डति, तते णं सा देवदत्ता दारिया उम्मुक्कबालभावा जोव्वणेण रूवेण लावण्णे य जाव अतीव उक्किट्ठा उक्किट्ठसरीरा जाय यावि होत्था ।
तते णं सा देवदत्ता दारिया अन्नया कयाइ व्हाया जाव विभूसिया बहूहिं खुजाहिं जाव परिक्खित्ता उप्पिं आगासतलगंसि कणगतिंदूसेणं कीलमाणी विहरइ, इमं च णं वेसमणदत्ते राया हाए जाव विभूसिए आसं दुरूहित्ता बहूहिं पुरिसेहिं सद्धिं संपरिवुडे आसवाहिणीयाए निज्जायमाणे दत्तस्स गाहावइस्स गिहस्स अदूरसामंतेणं विइवयति ।
तते गं से वेसमणे राया जाव विइवयमाणे देवदत्तं दारियं उप्पिं आगासतलगंसि कणगतिंदूसेण य कीलमाणीं पासति, देवदत्ताए दारियाए जुव्वणेण य लावण्णेण य जाव विम्हिए कोडुंबियपुरिसे सद्दावेति सद्दावेत्ता एवं वयासी- कस्स णं देवाणुप्पिया ! एसा दारिया किंवा नामधे जेणं ?, तते णं ते कोडुंबियपुरिसा वेसमणरायं करयल० एवं वयासी- एस णं सामी ! दत्तस्स सत्यवाहस्स धूआ कन्नसिरीए भारियाए अत्तया देवदत्ता नामं दारिया रूवेण यजुव्वणेण य लावण्णेण य उक्किट्ठा उक्किट्ठसरीरा । तते णं से वेसमणे राया आसवाहणियाओ पडिनियत्ते समाणे अब्तिरद्वाणिज्जे पुरिसे सद्दावेइ अब्मिंतरट्टाणिज्जे पुरिसे सद्दावेत्ता एवं वयासी - गच्छह णं तुभे देवाणुप्पिया ! दत्तस्स धूयं कन्नसिरीए भारियाए अत्तयं देवदत्तं दारियं पूसणंदस्स जुवरन्नो भारियत्ताए वरेह, जतिवि सा सयंरज्जसुक्का ।
तते णं ते अब्भितरट्ठाणिज्जा पुरिसा वेसमणेणं रन्ना एवं वुत्ता समाणा हट्ठट्ठा करयल जाव पडिसुर्णेति २ व्हाया जाव सुद्धप्पावेसाइं संपरिवुडा जेणेव दत्तस्स गिहे तेणेव उवागच्छित्था, तते णं से दत्ते सत्थवाहे ते पुरिसे एज्जमाणे पासति ते पुरिसे एजमाणे पासित्ता हट्ठतुट्ठ० आसणाओ अब्भुट्ठेइ आसणाओ अब्भुट्ठित्ता सत्तट्ठपयाइं पचग्गते आसणेणं उवनिमंतेति २ ते पुरिसे आसत्थे वीसत्थे सुहासणवरगए एवं वयासी-संदिसंतु णं देवाणुप्पिया ! किं आगमणप्पओयणं ?
तते णं ते रायपुरिसा दत्तं सत्थवाहं एवं वयासी- अम्हे णं देवाणु० तव धूयं कण्हसिरीए अत्तयं देवदत्तं दारियं पूसनंदिस्स जुवरण्णो भारियत्ताते वरेमो, तं जइ णं जाणासि देवा० जुत्तं वा पत्तं वा सलाहणिज्जं वा सरिसो वा संजोगो दिज्जउ णं देवदत्ता भारिया पूसनंदिस्स जुवरण्णो, भण देवाणुप्पिया! किं दलयामो सुक्कं ?, तते णं से दत्ते अब्भितरट्ठाणिज्जे पुरिसे एवं वयासी- एवं चेवणं देवणुप्पिया ! मम सुक्कं जन्नं वेसमणे राया मम दारियानिमित्तेणं अणुगिण्हति, ते ठाणेज्जपुरिसे विपुलेणं पुप्फवत्तगंधमल्लालंकारेणं सक्कारेति २ पडिविसज्जेति ।
तते णं ते ठाणिज्जपुरिसा जेणेव वेसमणे राया तेणेव उवागच्छति २ त्ता वेसमणस्स रनो एयमट्टं निवेदेति, ततेणं से दत्ते गाहावती अन्नया कयावि सोभणंसि तिहिकरणदिवसनक्खत्तमुहुत्तंसि विपुलं असणं ४ उवक्खडावेइ २ त्ता मित्तनाति० आमंतेति ण्हाते जाव पायच्छित्ते सुहासणवरगते
For Private & Personal Use Only
www.jainelibrary.org
Jain Education International
| SR No. | 003312 |
| Book Title | Agam Suttani Satikam Part 08 Vipakshrut Auppatik Rajprashniya Sutram |
| Original Sutra Author | N/A |
| Author | Dipratnasagar, Deepratnasagar |
| Publisher | Agam Shrut Prakashan |
| Publication Year | 2000 |
| Total Pages | 372 |
| Language | Prakrit, Sanskrit |
| Classification | Book_Devnagari, Agam, Canon, agam_vipakshrut, agam_aupapatik, & agam_rajprashniya |
| File Size | 20 MB |