________________
पाठ -8
महुबिंदु-दिटुंतं कोइ पुरिसो बहुदेसपट्टणवियारी अडविं सत्थेणं समं पविट्ठो। चोरेहिं य सत्थो अब्भाहओ। सो पुरिसो सत्थपरिभट्ठो मूढदिसो परिब्भमंतो दाणदुद्दिणमुहेण वणगएण अभिभूओ। तेण पलायमाणेण पुराणकूवो तणदब्भपरिच्छन्नो दिट्ठो। तस्स तडे महंतो वडपायवो। तस्स पारोहो कूवमणुपविट्ठो।
सो पुरिसो भयाभिभूओ पारोहमवलंबिऊण ठिओ कूवमझे आलोएइ य-अहो तत्थ अयगरो महाकाओ वियारियमुहो गसिउकामोतं पुरिसमवलोएइ। तिरियं पुण चउद्दिसिं सप्पा भीसणा डसिउकामां चिट्ठति। पारोहमुवरं किण्हसुक्किला दो मूसया छिंदंति। हत्थी हत्थेण केसग्गे परामुसइ। तम्मि य पायवे महापरिणाहं महुं ठियं । गयसंचालिए य पायवे वायविहूया महुबिंदु तस्स पुरिसस्स केइ मुहमाविसंति, ते य आसाएइ । महुरा य डसिउकामा परिवयंति समंतओ।
तस्स एवंगयस्स किं सुहं होइ ? जे महुबिंदु अहिलसइ तत्तियं तस्स सुहं सेसं दुक्खं ति। उवसंहारो पुण दिटुंतस्स -
जहा सो पुरिसो, तहा संसारी जीवो। जहा सा अडवी, तहा जम्मजरारोगमरणबहुला संसाराडवी। जहा वणहत्थी, तहा मच्चू। जहा कूवो, तहा देवभवो मणुस्सभवो य। जहा अयगरो, तहा नरगतिरियगईओ। जहा सप्पा, तहा कोहमाणमायालोहा चत्तारि कसाया दोग्गइगमणनायगा। जहा पारोहो, तहा जीवियकालो। जहा मूसगा, तहा कालसुक्किला पक्खा राइंदियदसणेहिं परिक्खिवति जीवियं। जहा दुमो, तहा कम्मबंधणहेऊ अन्नाणं अविरई मिच्छत्तं च। जहा महुँ, तहा सद्दफरिसरसरूवगंधा इंदियत्था। जहा महुयरा, तहा आगंतुगा सरीरुग्णया य बाही।
तस्सेव भयसंकडे वट्टमाणस्स कओ सुहं ? महुबिंदुरसासायओ केवलं सुहकप्पणा।
54
प्राकृत गद्य-पद्य सौरभ भाग - 2
Jain Education International
For Personal & Private Use Only
www.jainelibrary.org
