________________
उत्तरज्झयणाणि-१ गुहाद्वारेऽवने वन्याः समीपे पुरगोपुरे । कायोत्सर्गेण ते तस्थुः क्रमादस्तङ्गते रवौ ॥५।। शीताधिक्यं दृढास्तत्र ते सर्वेऽपि विषेहिरे । लीनात्मानः परे तत्त्वे निष्प्रकम्पाः सुराद्रिवत् ॥६॥ निशश्चतुर्षु यामेषु क्रमात् सुस्था दिवं ययुः ।
सम्यग्विषहितो दद्यात् किं न सौख्यं परीषह: ? ॥७॥ इति तृतीयपरीषहे साधुचतुष्टयकथा ||७|| शीतानन्तरमुष्णमित्युष्णपरीषहमाह
उसिणपरितावेणं परिदाहेण तज्जिए ।
गिम्हे वा परितावेणं सायं नो परिदेवए ॥८॥ व्याख्या-उष्णस्पर्शवद्भू–शिलादिपरितापेन परिदाहेन, बहि: स्वेद-मलाभ्यां वह्निना वान्तश्च तृष्णाजनितदाघस्वरूपेण तर्जितोऽतिपीडितस्तथा ग्रीष्मे वाशब्दाच्छरदि परितापेन रविकरादिकृतेन तर्जित इति योज्यम् । सातं सुखं प्रति न परिदेवेत हा ! कदा शीतर्तु-शीतांशुकरादयः सुखहेतवः सम्पत्स्यन्ते ? इति न प्रलपेत् ॥८॥ किञ्च
उण्हाभितत्तो मेहावी सिणाणं नो वि पत्थए ।
गायं नो परिसिंचिज्जा ण वीएज्ज य अप्पयं ॥९॥ व्याख्या-उष्णेनाभितप्तः पीडितो मेधावी मर्यादावान् स्नानं जलाभिषेकं नो नैव प्रार्थयेदभिलषेदपि । तथा गात्रं देहं नो परिषिञ्चेत् सूक्ष्मोदकबिन्दुभिरार्दीकुर्यात् । न वीजयेत् तालवृन्तादिनाऽल्पकं किं पुनर्बह्वेवमुष्णपरीषहोऽरहन्नकमुनेरिव । तथाहि
तगरायां महापुर्यां दत्तोऽभूद् वणिजां वरः । तस्य भद्राऽभिधा भार्या तयोः पुत्रोऽरहन्नकः ॥१॥ अर्हन्मित्रगुरोः पार्श्वे श्रुत्वा सद्धर्मदेशनाम् । स संवेगरसापूर्णः प्राव्राजीत् सपरिच्छदः ॥२॥ युग्मम् पुत्रप्रेम्णाऽथ तं क्षुल्लं भैक्ष्यायाभ्रामयन्न हि । वृद्धः पुपोष मिष्टान्न-पानैर्वारत्रयं दिने ।।३।।
Jain Education International 2010_02
For Private & Personal Use Only
www.jainelibrary.org
