________________
३५०
उत्तरज्झयणाणि-१ आस्ते मध्यविदेहेषु नगरी पुण्डरीकिणी । महापद्मोऽभवद् भूपस्तत्र पद्मावतीपतिः ॥३९॥ पुण्डरीक-कण्डरीको द्वावभूतामदःसुतौ । आददे भूधरं पुण्डरीके न्यस्य व्रतं नृपः ॥४०॥ उत्पाद्य ज्ञानमत्युग्रच्छायं न्यायं च केवलम् । क्रमात् प्राप्तौ महापद्म-पुण्डरीकौ महोदयम् ॥४१॥ गुरूणां नलिनीगुल्मोपवनोपैयुषां गिरा । पुण्डरीकः प्रबुद्धः सन् संविग्नोऽभाषतानुजम् ॥४२॥ क्षमाद्वयं क्रमाद् भ्रातस्तातस्तावदपालयत् । आद्या त्वया मया चान्या ते पाल्येऽथ विभागतः ॥४३।। कण्डरीकोऽभ्यधादाद्यां क्षमामाद्यः पितुः सुतः । त्वं पालय द्वितीयं तु द्वितीयः पालयाम्यहम् ॥४४॥ व्रतमत्सरिणो वत्स ! विषया विषमूर्तयः । रक्षेः स्वानि हृषीकाणि मा चलानि मिलन्तु तैः ॥४५॥ इत्युक्तेऽप्यनपक्रान्तं व्रतैकाध्यवसायतः । पुण्डरीकोऽनुजं दीक्षाग्रहणायान्वमन्यत ॥४६।। स्वयं पुनः प्रजाः पातुं तस्थौ भावयतिर्गृहे । तपस्तनुकृशो जज्ञे कण्डरीकस्तु संयमी ॥४७।। वसन्तसमयेऽन्येधुर्मत्तो दन्तीव पादपम् । तच्चेतश्चालयामास चारित्रावरणोदयः ॥४८।। अथैत्य पुण्डरीकिण्यां पुण्डरीकमहीभुजे । उद्यानस्थोऽयमुद्यानपालेन स्वमजिज्ञपत् ॥४९।। बद्ध्वोपकरणं वृक्षशाखायां भूतले स्वयम् । सचित्तेऽपि निविष्टोऽयं प्राप्तेनादर्शि भूभुजा ॥५०॥ एनं तथास्थमालोक्य ज्ञात्वा संयमतश्चलम् । कण्डरीकं करे लात्वा प्रोचिवान् सचिवान् नृपः ॥५१॥ प्रागप्ययं मयाऽवारि चारित्रग्रहणेऽनुजः । मुदे तदस्तु प्रव्रज्याराज्ययोर्व्यत्ययोऽद्य नौ ॥५२॥
Jain Education International 2010_02
For Private & Personal Use Only
www.jainelibrary.org
