________________
दशमं द्रुमपत्रीयमध्ययनम्
ततस्तानतिसंविग्नो गौतमोऽक्षमयत्तराम् । केवलं न ममाद्यपीति मनाग् विषसाद च ॥२४॥ इतश्च देवगीरासीदद्य व्याख्यदिदं जिनः । नरोऽष्टापदयात्राकृत् तद्भवे मुक्तिमृच्छति ॥२५।। तच्छ्रुत्वा गौतमोऽपृच्छद् याम्यहं चैत्यवन्दनम् । आधातुं तत्र सर्वज्ञोऽन्वज्ञासीदमुं लघु ॥२६॥ तुष्टोऽथ गौतमोऽचालीदितश्चैते तपस्विनः । कौडिन्य-दत्त-सेवलाः प्रत्येकं पञ्चभिः शतैः ॥२७॥ तापसानां परिवृता एक-द्वि-त्र्युपवासिनः । क्रमात् कन्दादिसेवालशुष्कसेवालपारणाः ॥२८॥ तप:शक्त्यैकक-द्वि-त्रिसोपानारोहशक्तयः । ते क्लिश्यन्ते स्म कैलासचूलिकामारुरुक्षवः ॥२९॥ आयान्तं गौतमं दृष्ट्वा यावद् दध्युरमी हृदि । चूलां गन्तुं कथं शक्तः स्थूल एष हि निस्तपाः ॥३०॥ क्षणाच्चारणलब्ध्याऽथ तावदुत्प्लुत्य गौतमः । निश्चित्य गौतमं मार्गं पश्यन्तस्तस्थुरुन्मुखाः ॥३२॥ सोऽप्यद्रिशिखरे सिंहनिषद्ये जिनवेश्मनि । चतुरोऽष्टौ दश द्वौ च ववन्दे विधिनाऽर्हतः ॥३३।। सम्भवाद्यानपाच्यादिस्थितान् द्वाविंशतिजिनान् । नत्वा सृष्टिक्रमाद् यावत् पूर्वस्यामृषभाजितौ ॥३४॥ हर्षान्नुत्वा च सर्वाहं सायं देवगृहाद् बहिः । दिशीशान्यामशोकद्रोरधोऽचित्तशिलास्थितः ॥३५।। समित्राय समेताय नन्तुं वैश्रवणाय सः । तपःकृशान् मुनीन् बाढं वर्णयामास गौतमः ॥३६।। गुरोरकृशमाकारं दृष्ट्वा श्रुत्वा च तां गिरम् । संशयाने वैश्रवणे गौतमः पुनरब्रवीत् ॥३७॥ व्यवहारे तपः श्रेष्ठं परिणामस्तु निश्चये । ज्ञातेन पुण्डरीकस्य ज्ञेयं तच्चाधुना शृणु ॥३८॥
Jain Education International 2010_02
For Private & Personal Use Only
www.jainelibrary.org
