________________
२९९
नवमं नमिप्रव्रज्याख्यमध्ययनम्
करकण्डुप्रसूरेनं साध्वी पद्मावती सती । अश्रौषीत् क्रमतो लोकाद् विग्रहं पितृ-पुत्रयोः ॥१७१।। बालोत्पत्त्यादि निखिलं प्रवर्तिन्यै निवेद्य तत् । सैन्येऽङ्गजान्तिके साऽगात् क्षणज्ञा तदनुज्ञया ॥१७२॥ अभ्युत्थिता नता तेनासनस्थेत्यभ्यधीयत ।। वत्सलोऽस्मि ध्रुवं मातर्वदागमनकारणम् ॥१७३॥ साऽप्याख्यत् प्राणसंहारकारणे रणकर्मणि । यत्नः कोऽयं गुरुं यत्र त्वं सुतोऽपि जिघांससि ॥१७४।। विस्मितः करकण्डुस्तामुवाच किमितीदृशम् ? । भगवत्योदितं वाक्यं वतिन्याऽपि ह्यसङ्गतम् ॥१७५।। पिता मम श्वपाकोऽयं तं तु सेवेऽस्मि देववत् । साध्व्युवाच वदेर्मेवं क्षत्रवंशैकभास्कर ! ॥१७६।। राजन् ! प्रतीहि माताऽहं पिताऽयं दधिवाहनः । दोहदस्त्वयि गर्भस्थे ममाभूद् गजरोहणे ॥१७७॥ इत्यादि तावदाख्यत् सा यावत् त्यक्तोऽसि जन्मनि । सोऽपि श्वपाकाद् वृत्तान्तं निश्चिकाय जहर्ष च ॥१७८।। वत्सैनं विग्रहं मुञ्च पद्मावत्येति भाषिते । ज्ञाततातोऽप्यसौ गर्वान्न तद्वाक्यममन्यत ॥१७९।। युवाऽयं यौवनोन्मादी गुरूनप्यवमन्यते । तद् याम्यन्तरुपाङ्गेशं सोऽस्याभ्यायास्यति स्वयम् ॥१८०॥ इति ध्यात्वा समुत्थाय प्राप चम्पान्तरद्भुतम् । राजसौधमसौ राजतन्त्रः सर्वोऽपि पिप्रिये ॥१८१।। ज्ञात्वा पद्मावती साध्वीं भक्त्या नेमुर्नुपाङ्गाः । सत्वरं नरनाथोऽपि श्रुत्वाऽऽयातस्तदन्तिकम् ।।१८२।। प्रागेवागत्य सप्रेमाऽपृच्छद् गर्भः क्व सोऽस्ति मे ? | सर्वमाख्याय सोवाच त्वां योऽरौत्सीत् स ते सुतः ॥१८३॥ तं सुतागमवृत्तान्तं फुल्लरोमाञ्चकञ्चकः । निशम्य भूपस्त्वरितं प्रतस्थेऽभि तदुत्सुकः ॥१८४।।
Jain Education International 2010_02
For Private & Personal Use Only
www.jainelibrary.org
