________________
१४८
उत्तरज्झयणाणि-१ क्षीरोदधौ मषीबिन्दुरिव नात्र गुणोदधौ । वैरूप्याय भवेद् द्यूतमित्येषा स्वं समादधे ॥९२॥ अस्ति चास्या दृढप्रेमाऽचलनामा सुहृद्वरः । सार्थवाहसुतस्तुल्यवयाः कुलगृहं श्रियाम् ॥९३॥ स यदीप्सितदाताऽस्या मूलदेवे नु मत्सरी ।। एकद्रव्याभिलाषित्वं परं हि द्वेषकारणम् ॥९४॥ शङ्कयाऽस्य न यात्येष तद्वेश्मनि यदा तदा । प्रवृत्तो व्यसने को हि महानपि न शङ्कते ? ॥९५।। कुट्टिन्या देवदत्तोचे त्यजैनं पुत्रि ! दुर्दशम् । किं ते निर्धनचङ्गेनानेन साध्यं प्रयोजनम् ? ॥९६।। तवाभीप्सितकल्पद्रुरचलो हि विराध्यते । एतत्प्रीत्या नैककोशे कृपाणद्वितयं भवेत् ॥९७॥ स्वस्मादपि हि यो हीनस्तत्र यो रागवान् भवेत् । रागं न तत्र बध्नन्ति मानिनो हि महाशयाः ॥९८॥ द्यूतव्यसनिनं मुञ्च तदमुं मद्वचः शृणु । वेश्यानां कुलधर्मोऽयं धनवत्येव रज्यते ॥९९।। साऽभणन्नाहमम्बाऽस्मि धनमात्रानुरागिणी । गुणेषु प्रतिबन्धो मे दुर्लभेषु धनैरपि ॥१००।। गुणाः स्युस्तस्य के द्यूतकवलीकृतसम्पदः । इत्युक्ते साऽवदद् वक्तुं शक्यन्ते तद्गुणाः कथम् ? ॥१०१।। महेच्छा-धैर्य-गाम्भीर्य-दाक्षिण्यादिगुणाम्बुधिः । प्रियभाषी कलाशाली नान्यः कोऽप्यस्ति तत्समः ॥१०२।। रोचते यन्मनो यस्मै तस्य सर्वस्वमेव सः । न मनो रोचते यस्मै स नृपोऽप्यस्य तार्णवत् ॥१०३॥ तत् त्याज्यतां कथं याति गुणवानेष मे सुहृत् ? । यस्मै दैवेन यो दत्तः स तेन कुरुते रतिम् ॥१०४।। उपायेन निवत्यै॒यमस्मादिति विभाव्य सा । मार्गितेऽलक्तके पोतं प्रणामयति नीरसम् ॥१०५॥
Jain Education International 2010_02
For Private & Personal Use Only
www.jainelibrary.org
