________________
१४४
उत्तरज्झयणाणि-१ निःस्वोऽपि हि कलाशाली विश्रामोऽस्यास्तु चेतसः । यदर्थी यो हि तत्रैव स रक्तोऽन्यत्र नो पुनः ॥३८।। वेश्येत्यभिधयोद्विग्नो मा भूः सद्वंशजेव सा । चतुरं प्रीणयित्री त्वां मालतीव मधुव्रतम् ॥३९॥ कलाविदः किलैकस्य को विनोदः स्वसाक्षिणः ? । तया समेत्य तद् भद्र ! भवन्तु सफलाः कलाः ॥४०॥ वेश्यात्वमपि विज्ञानगुणात् तस्या न दोषकृत् । करभस्याशुगत्या हि च्छादिता दोषसन्ततिः ॥४१॥ एतत्तद्वाक्यचातुर्यवशादुत्थाय सत्वरम् । गृहीत्वा तां करे तस्या गेहं गन्तुमुपाक्रमत् ॥४२॥ व्रजन्नध्वन्यसौ तस्या विज्ञानाद्यतिशेषवान् । विद्ययाऽऽस्फल्य मर्मण्यपनिन्ये कुब्जतामपि ॥४३।। सा प्रापात्यन्तिकं चित्रं गेहं प्रावेशयद् द्रुतम् । तं वामनं समालोक्य देवदत्ता विसिष्मये ॥४४॥ सलावण्यमहो ! रूपं माधुर्यं कटरि ! ध्वनौ । कलाकलापपूर्णेन्दावत्र वामनतामृगः ॥४५।। ईषदभ्युत्थिता तस्यादापयत् सिंहविष्टरम् । अस्मै तत्र निषण्णाय ताम्बूलं सा ददौ स्वयम् ॥४६।। कुब्जिकाकुब्जनिर्नाशदर्शनोल्लासिचित्तया । तया स कर्तुमारेभे आलापान् स्निग्धया गिरा ॥४७।। विदग्धोचितसंलापैस्तस्याः सोऽवशयन्मनः । दुःसाध्यसाधने नृणां प्रियालापो हि कार्मणम् ॥४८॥ उपकारः प्रियालाप: स्थिरा प्रीतिरिति त्रयम् । सतां स्वभावतः सिद्धमिन्दौ शिशिरता यथा ॥४९॥ इतश्च तान्त्रिकः कश्चित् तथा तन्त्रीमवादयत् । तस्याः पुरो यथा साऽऽसीत् कौतुकैकवशंवदा ॥५०॥ तां दृष्ट्वा कौतुकोत्तुङ्गनगारूढां वराङ्गनाम् । साध्वी वीणेति भाषन्ती मूलदेवो व्यभाषत ।।५१।।
Jain Education International 2010_02
For Private & Personal Use Only
www.jainelibrary.org
