________________
द्वितीयं परीषहाध्ययनम्
परं द्वात्रिंशदप्येते समानायुष्कतावशात् । समकालं विपत्स्यन्ते दुर्लध्या भवितव्यता ॥३९।। विषादं मा कृथा गर्भव्यथामपहरामि ते । तथैव कृत्वा स सुरस्त्रिदशाश्रयमाश्रयत् ॥४०॥ स्वस्थदेहा बभारैषा गर्भानुर्वीवदङ्करान् । अहो ! पुण्यस्य माहात्म्यं यद् देवा अपि किङ्कराः ॥४१॥ प्रासूत सुलसा काले पूर्णे द्वात्रिंशतं सुतान् । द्वात्रिंशल्लक्षणोपेतान् मूर्त्तान् वीररसानिव ॥४२॥ नागो नागरिकं लोकमाकार्य निजवेश्मनि । तेषां जन्मोत्सवं कृत्वा नामान्यपि विनिर्ममे ।।४३।। सञ्जातयौवनोल्लेखाः श्रेणिकक्षितिशासितुः । जीवितव्यमिवाभूवन्ननिशं पार्श्ववर्तिनः ॥४४॥ चेटकक्ष्माभृतः पुत्री सुज्येष्ठामभिलाषुकः । वैशालीमन्यदा राजा यियासुर्नागनन्दनान् ।।४५।। महारथान् रथारूढान् रथी प्रथितपौरुषान् । सहायीकृत्य तद्दत्तसङ्केतप्रस्थितः पुरात् ॥४६॥ युग्मम् सुरङ्गयाऽविशत् सौधं दूतज्ञाततदागमा । प्राग्दृष्टाचित्रफलकरूपसंवादमोदिनी ॥४७॥ यियासुरथ सुज्येष्ठा चेल्लणां भगिनीं मुदा । प्रतिश्रुतैकसंवासां तं वृत्तान्तमवेदयत् ॥४८॥ युग्मम् साऽऽचचक्षे पुरा त्वं मामारोपय महारथे । त्वद्वियोगं सहे नाहमित्यारोप्यत सा तया ॥४९।। गता स्वयं समानेतुं रत्नापूर्णकरण्डिकाम् । यावत् तावत् सौलसेयाः श्रेणिकेशं बभाषिरे ॥५०॥ अत्र वैरिगृहे राजन् ! न स्थातुं युज्यते चिरम् । तत्प्रेरितः समादाय चेल्लणां व्याघुटन्नृपः ॥५१॥ आगादादाय सुज्येष्ठा यावद् रत्नकरण्डिकाम् । नैक्षिष्ट श्रेणिकं तावद् घटान्त:स्थितदीपवत् ॥५२॥
Jain Education International 2010_02
For Private & Personal Use Only
www.jainelibrary.org
