________________
१२९
द्वितीयं परीषहाध्ययनम्
नापरां दयितां प्राणेश्वरि ! कुर्वेऽत्र जन्मनि । भुक्त्वा कल्पलताच्छायां कपिकच्छू श्रयेत कः ? ॥११॥ त्वत्कुक्षिपद्मिनीहंसमीहे निश्चितमात्मजम् । सुरोपयाचितैस्तस्मात् कान्ते ! जनय नन्दनम् ॥१२॥ त्रयान्यतमयोगेन परं दयितदैवतम् । नारिरिप्सामि मुक्त्वैकमर्हन्तं स्वेष्टसिद्धये ॥१३।। अर्हद्धर्मानुभावेन धर्मपुत्रादयः सुताः । कुन्त्या अपि निशाम्यन्ते विश्वविश्वैकविश्रुताः ॥१४॥ तथैवाहं त्रिधा शुद्ध्याऽऽधास्ये यत्नं निरन्तरम् । दधती ब्रह्म देवार्चा-तपःप्रभृति तन्वती ॥१५।। ततः सेत्स्यति मेऽभीष्टं माऽत्रार्थे संशयं कृथाः । यस्य सिद्धिप्रदानेऽस्ति क्षमत्वं तस्य किं ह्यदः ? ॥१६।। इत्याख्याय विशिष्यैषाऽर्हद्धर्मे रताऽजनि । सस्मार नान्यदेवानां मनसाऽपि मनागपि ॥१७॥ धर्मस्थैर्यमितः शक्रः सुलसायाः सभासदाम् । प्रशशंस पुरस्तुष्टः साधमिकसमाधिकृत् ।।१८।। सर्वेऽप्यमंमनुः शाक्रं वचः प्राय: सुदृष्टयः । परीक्षाऽर्थं पुनर्देव एको भुवमवातरत् ।।१९।। प्राविशत् सुलसागेहं साधुमुद्राऽभ्यलङ्कृतः । सत्कृत्यान्तरलीनाऽपि सोदस्थाद् वीक्ष्य तं द्रुतम् ॥२०॥ भक्त्या प्रणम्य चापृच्छत् स्वगेहागमकारणम् । सोऽवदल्लक्षपाकाख्यतैलार्थं वैद्यशासनात् ।।२१।। साऽपि हृष्टाऽऽशु तैलस्य चिन्तयन्ती कृतार्थताम् । आनैषीत् तद्धटं यावत् तावत् तमभनक सुरः ।।२२।। साध्वर्थमुपनीतस्य न तस्यापि फलं मया । तैलस्यास्याददे सेति ध्यायन्ती विषसाद न ॥२३॥ द्विगुणप्रोल्लसद्भावा द्वितीयं तमुपानयत् । तमप्यभाङ्क्षीत् स ततस्तार्तीयीकं तथाऽकरोत् ॥२४॥
Jain Education International 2010_02
For Private & Personal Use Only
www.jainelibrary.org
