________________
७९
द्वितीयं परीषहाध्ययनम्
काममङ्करयन् कामं रोहयन् विरहिव्यथाम् । प्रास्फुरद् दाक्षिणो वायुर्मानिभिर्मानमुज्झयन् ॥१७६।। मञ्जरीपिञ्जरीभूतमाकन्दे कोकिलारवः । तथा प्रादुरभूद् ध्यानाद् योगिनोऽपि यथाऽचलन् ॥१७७।। प्रोषितप्रेयसीपिण्डनि:पीतरुधिरा इव । अतिरक्ता अदृश्यन्त किंशुके काममार्गणाः ॥१७॥ पुष्पेषुमित्रं पुष्पेषोर्मधुर्विजयशालिनः । नानाकुसुमनिष्पत्त्या विततान सहायताम् ॥१७९।। प्राच्यामथोदगाच्चन्द्रो मानिनीमानभित्तये । गृह्णानः कैरवात् कोशादलिश्रेणिकृपाणिकाम् ॥१८०।। आधाय जानकीरूपं दिव्यालङ्कारबन्धुरम् । रामाभ्यासं सुरः प्राप्तः प्रेमतस्तं कटाक्षयन् ॥१८१।। सुराङ्गनाश्च साराङ्ग्यस्तं क्षणात् पर्यवेष्टयन् । रामभद्रं वरिष्याम इति गीविकटाननाः ॥१८२।। अथ सीता स्मितस्मेरमुखी श्रीराममूचुषी । आर्यपुत्र ! वियोगार्ता त्वामालीनाऽस्मि सम्प्रति ॥१८३।। नाथे ! त्वया निषिद्धाऽपि दीक्षामहमुपाददे । खेचरीभिस्तपस्यन्ती हठादपहृताऽस्मि च ॥१८४।। ताभिरुक्ताऽथ मुक्त्वेशं रामं कस्मै तपस्यसि ? । स्त्रीणां हि रामकान्तानां पर्याप्ताः सुखराशयः ॥१८५।। त्वां पुरस्कृत्य तं कान्तं प्रतिपद्यामहे वयम् । तं दर्शयेत्यतो नाथ ! तद्युक्ता त्वामुपागमम् ॥१८६।। मां पुरस्कृत्य नाथैताः सनाथय कृपाम्बुधे ! । इत्युक्त्वा निर्भरं दो• तं सस्नेहमपीडयत् ॥१८७॥ वनं वसन्तो रजनी प्रियाऽभ्यासो विधूदयः । एतावत्यपि रामस्य न मनाग् बिभिदे मनः ॥१८८।। परीषहचमूदुर्गे राम ! संयमसंयुधि । बहवोऽपि भटा भङ्गमापुः किं नाम ताम्यसि ? ॥१८९।।
Jain Education International 2010_02
For Private & Personal Use Only
www.jainelibrary.org
