________________
खण्ड:-२ दृष्टान्तसमुच्चयः
२६५
भूवालो वि सुभदं दळू करकलियचालिणीसलिलं । अब्भुट्ठिओ सपउरो संचलिओ सम्मुहो तीए ।।७३।।
धरविलुलियसिरकमलो पणमित्तु महासईचरणकमलं ।
पभणइ माइ ! महासइ ! महापसायं करेऊण ।।७४ ।। उग्घाडेसु कवाडे पुरीपओलीण ता सुभद्दा वि । पुव्वदुवारं पत्ता अणुगम्मंती नरिंदेण ।।७५ ।। एत्यंतरे महासइ कोउयअक्खित्तमाणसा गयणे । संपत्ता सुर-किन्नर-विज्जाहर-असुरसंघा य ।।७६।। तयणंतरं सुभद्दाए तिन्नि वाराओ चालणिजलेण । अच्छोडिए कवाडे काऊणं जिणनमोक्कारं ।।७७ ।। उग्घाडिए कवाडे झड त्ति चिक्कारगहिरनिग्घोसे । उच्छलिए जयसद्दे सिद्धिं सुरदुंदुहिसरेण ।।७८ ।। मुक्का य कुसुमवुट्ठी सुरेहिं परिमलभमंतभमरउला । जयउ सुभदासीलं ति जंपिउं तीए सिरउवरे ।।७९।। तो भणइ पुहइपालो धन्ना सि तुमं महासईतिलए ! । जीए सीलेणेवं अमरा वि कुणंति सन्निझं ।।८०।।
तं जयउ जए सीलं जस्स पभावेण तवइ तरणी वि ।
वरिसइ य निययसमयम्मि जलहरो अमयधाराहिं ।।८१।। तयणंतरं सुभद्दा भूवइपज्जंतपउरपरियरिया । गंतूण समुग्घाडइ दाहिण-पच्छिमपओलीओ ।।८२।। तत्तो उत्तरदारं जलेण अभिसिंचिउं भणइ एवं । उग्घाडउ सा एयं जा वहइ महासईगव्वं ।।८३ ।।
अज्ज वि चंपानयरीए सा तह चेव चिट्ठइ पओली । तयणु सुभद्दा जिणनाहमंदिरं पइ समुच्चिलिया ।।८४ ।। सलहिज्जंती सुरवरगणेहिं विज्जाहरेहिं थुव्वंती । वंदीहिं पढिज्जंती गिज्जती अमररमणीहिं ।।८५।। पणमिज्जंती नायरजणेहिं जिणपवयणं पभावंति । जिणमंदिरम्मि पत्ता थुणिऊण जिणेसरं तत्थ ।।८६।। तत्तो गंतुं वसहीए साहुणो वंदिऊण भत्तीए ।
संचलिया नियभवणे धरणियले निहियनियनयणा ।।८७।। नञ्चिरविलासिणीसुं परिवज्जिरगहिरतूरनियरेसुं । गिज्जंतचञ्चरीसुं संपत्ता निययभवणम्मि ।।८८ ।।
तो पणमिऊण राया तगुणरंजियमणो गओ सगिहं । सीलेण सुभद्दाए दइओ वि अईव अणुरत्तो ।।८९।। इय सा सीलपहावा सलाहणिज्जा सयाण लोयाण । भोत्तूण विसयसोक्खं उववन्ना तियसलोगम्मि ।।९० ।।
Jain Education International 2010_02
For Private & Personal Use Only
www.jainelibrary.org
