________________
आतुरप्रत्याख्यानप्रकीर्णकम्
संपइ पुरीए चउरो पिहिऊणं गोउरे अहिट्ठिस्सं । तं मोत्तुं न हु अन्नो होही उग्धाडणसमत्थो ।।५४।। गयणंगणम्मि ठाउं पभणिस्सं जा महासई का वि । सा उग्घाडउ चालणिकयसलिलेणं दुवाराइं ।।५५ ।। उग्घाडिस्ससि तं चेव ताई इय जंपिउं तओ तियसो । सोयामणिपुंओ इव झड त्ति असणीहुओ ।।५६।। तयणन्तरं सुभद्दा उस्सग्गं पारिऊण हिट्ठमणा । निग्गमइ निसं जाए पभायसमए पुरीलोओ ।।५७ ।।
उग्घाडइ जाव समुग्घडन्ति त कह वि नो कवाडाइं ।
फोडंतस्स वि फुटृति न उण वज्जं व लोयस्स ।।५८ ।। ता सहसा उच्छलिओ रउद्दहाहारवो पुरजणस्स । आरसए एक्ककालं चउप्पयाणं समूहो वि ।।५९।। तारिसरूवं नाऊण नरवई तयणु आउलीहूओ । चिंतइ एयं नणु दिव्वविलसियं किं पि संभविही ।।६० ।। तत्तो य पुहइपालो परिहित्ता उल्लसाडयं सेयं । धूवकडच्छयहत्थो होउं पउरेहिं परियरिओ ।।६१।।
विन्नवइ विणयपुव्वं विहियपणामो सुकोमलगिराहिं । काउं महापसायं निसुणउ विन्नत्तियं मज्झ ।।६२।। देवस्स दाणवस्स व भूयस्य व किन्नरस्स कस्स वि य ।
जस्स मए अवरद्धं खमउ समग्गं पि सो मज्झ ।।६३।। तत्तो गयणे ठाऊण तेण अमरेण भणियमेयं भो ! । जा का वि इह पुरीए महासइत्तं समुव्वहइ ।।६४ ।। सा रमणी चालणियापक्खित्तजलेण तिन्नि वाराओ । अच्छोडिउं कवाडे उग्घाडउ निब्बियप्पं ति ।।६५ ।।
तं निसुणिऊण अहमहमिगाए सव्वाओ पुरपुरंधीओ ।
राया-ऽमञ्च-महायणभज्जाबहुयाओ वहुयाओ ।।६६।। कयन्हाण-मंगलाओ महासईगव्वमुव्वहंतीओ । चालणिजलपक्खिवणे विगुत्ताओ समग्गाओ ।।६७।। विगुत्ताओ जा सव्वनयरिनारीओ रायपज्जन्तं । ताव सुभद्दा सासुयपभिईण पुरो भणइ एवं ।।६८ ।।
अणुजाणसु अंब ! ममं अहमवि एवं जहा परिक्खेमि ।
हसिऊण तओ सव्वाओ ताओ एवं पयंपंति ।।६९।। जाण कवाडाण कए विग्गुत्ताओ महासईओ वि । उग्घाडसि ताणि तुमं नूणं जा समणपरिभुत्ता ।।७० ।। ताण निवारंतीण वि संगहिया तीए चालणी पवरा । तीए जलं पक्खित्तं परिगलइ न बिंदुमित्तं पि ।।७१।।
जायाणि कसिणवयणाणि ताणि सव्वाणि तो सुभद्दा वि । नियकरयलकयचालिणिसलिला चलिया निवसयासे ।।७२।।
Jain Education International 2010_02
For Private & Personal Use Only
www.jainelibrary.org
