________________
खण्ड:-२ दृष्टान्तसमुच्चयः
१६९
तथा चकयकूडकवडचाडुयरइकलिया कोढियं पि कामेइ । परिहरइ रइविरत्ता धणहीणं कामएवं पि ।।६३ ।। वीणा-विणोय-विन्नाणपगरिसुप्पन्नकित्तिरमणीयं । जइ वि हु एवं तह वि हु धणहीणं पुत्ति !
परिहरसु ।।६४ ।। तो भणइ देवदत्ता बहुवेणिपरंपरागया एसा । किं अम्मो ! किज्जिस्सइ रिद्धीकारट्टए तुज्झ ? ।।६५ ।।
एत्तो य तत्थ निवसइ सुरवइअयलो व्व अयलवरसेट्ठी ।
सइभद्दसालकलिओ वररयणो कणयकडओ य ।।६६।। सो अनया य गणियं वसंतमासम्मि विविहकीलाहिं । उज्जाणे कोलंतिं पेच्छइ सह मूलदेवेण ।।६७ ।। तो चिंतइ सो हियए कह होही संगमो मह इमाए ? । अहवा दव्वुवयारो पणंगणाणं वसीकरणं ।।६८ ।। इय चिंतउं पयट्टो तीए उवयरिउमत्थजाएण । उवरोहकयसिणेहा सा वि हु अभिरमइ तं अयलं ।।६९।। एचं च जंति दियहा सद्धिं अयलेण देवदत्ताए । परमञ्चंतसिणेहा सया वि सा मूलदेवम्मि ।।७० ।।
अह सा पुणरवि भणिया अक्काए निद्धणेण किह वच्छे ! ससएण व खोडेणं अणेण वणवाडओ रुद्धो ? ।।७१।। तो भणइ देवदत्ता गुणेहिं रत्ता धणम्मि न हु अंब ! ।
अंबा वि भणइ वच्छे ! अयलो वि हु गुणगणावासो ।।७२।। तो भणइ देवदत्ता जइ एवं अंब ! किज्जउ परिक्खा । इय भणिए नियदासिं चवलं अयलम्मि पेसेइ ।।७३।। भणइ तओ सा गंतुं पुरओ सेट्ठिस्स वयणमिणमेवं । जह तुज्झ वल्लहाए इक्खूहिं पओयणं अज्ज ।।७४ ।।
तो अयलो इक्खूणं सगडं भरिऊण पेसए तीए ।
तो भणइ देवदत्ता पेच्छाहं अम्ब ! किं करिणी ? ।।७५।। जेण सडाल-समूलयइक्खूणं सगडयं भरेऊणं । मह पेसियन्ति विनाणपगरिसं पेच्छ अयलस्स ।।७६ ।। संपइ पुण विन्नाणं अम्ब ! निरिक्खेसु मूलदेवस्स । इय भणिउं तं दासिं संपेसइ मूलदेवम्मि ।।७७ ।। तो सा साहइ गंतुं जूयप्फलयम्मि मूलदेवस्स । जह तुज्झ अज्ज दइया इच्छूवंछं समुव्वहइ ।।७८ ।। तो तेण वराडगदसदुगेण एगं गहाय वरलट्टि । सिग्घमसिधेणुछोल्लियगंडलए काउमचिरेण ।।७९।। अवरवराडगदसदुगसंगहियसरावसंपुडे खिवइ । पक्खिविय चाउजायं सूलासुं पोइउं तत्तो ।।८०।। पट्ठवइ तीए तग्गुणरंजियहियया पजंपए सा वि । जूयार-अयलविन्नाणअंतरं एरिसं अंब ! ।।८१।।
_Jain Education International 2010_02
For Private & Personal Use Only
www.jainelibrary.org
