________________
खण्ड:-२ दृष्टान्तसमुच्चयः
१६७
एत्यंतरस्मि कुमरो हारविरायंतवियडवच्छयलो । पिउपायपणमणकए समागओ तत्थ अत्थाणे ।।२१।।
पणमंतसयलसामंतमउलिमणिरयणकिरणकच्छुरिए । पयकमले मिलियनिडालमंडलो पणमइ कुमारो ।।२२।। जंपेइ महीवालो कयभिउडीभंगभासुरनिडालो ।
खत्तियणगोत्तखंपण ! अवसर मह दिठ्ठिपसराओ ।।२३।। कुमरो वि गुरुपराभवमन्नुभरुप्पन्नअसरिसामरिसो । पिइपरुसवयणपरिभवमसहंतो चिंतए हियए ।।२४।। उज्झति धणं मुंचंति परियणं महियलं परिचयंति । मरणे वि महासत्ता न उणो माणं परिहरंति ।।२५ । । अवि मरणमसमसाहसगिरिभइरवपडणवड्डियुच्छाहे । अहिलसइ महासत्तो न उणो माणं परिच्चयइ ।।२६।। इय चिंतिऊण कुमरो पणमित्ता पायपंकयं रन्नो । अत्थाणाओ नियत्तो तत्तो रयणीए जायाए ।।२७।। अहिमाणधणो नयराओ निग्गओ असमसाहससहाओ । वइरिकरिकुम्भदारणकरकलियकरालकरवालो ।।२८ ।। अणवरयमक्कमंतो गामाऽऽगरनगरमंडियं वसुहं । गुडियकयवामणंगो संपत्तो नयरिमुज्जेणिं ।।२९।। तत्थ दुरोदरदइओ निच्चं कलगीयदिन्नमइपसरो । अन्नायकुल-परक्कमपरमत्थो निवसइ सुहेण ।।३०।। अह अन्नया य दिट्ठो किन्नरकलगीयवावडो तत्थ । नियभवणमत्तवारणपरिविलसिरदेवदत्ताए ।।३१।। गीयाणुरायरत्ता वामणए तम्मि पेसए दासिं । साणुणयं सप्पणयं ससिणेहं सा वि तं भणइ ।।३२ ।।
वामणय ! तुम्ह दंसणसमुस्सुया सामिणी समाइसइ ।
मह किन्नर ! मणहरणो होसि तुमं गिहपवेसेण ।।३३।। तो भणइ मूलदेवो का सा तुह सामिणी ? तओ भणइ । सोहग्गजयपडाया पणंगणा देवदत्त त्ति ।।३४।। अह भणइ मूलदेवो विस्सासो मह न अत्थि वेसासु । खणरत्त-विरत्तासुं अवरा-ऽवरहरियचित्तासुं ।।३५ ।।
इयरासु वि जुवईसुं न वीससेयव्वमेत्थ कुडिलासु ।
विसमविससन्निभासू किं पुण वेसासु विस्सासो ? ।।३६।। अन्नोन्ननेहनिब्भररसाणुविद्धो न जत्थ सब्भावो । रूवावहरियदेहो न वामणो तत्थ अल्लियइ ।।३७ ।।
जा एवं नाऽऽगच्छइ ता साहइ सामिणीए सा गंतुं ।
सा वि पुणो वि भणावइ दासीवयणेण वयणमिणं ।।३८।। आगच्छ एक्कवारं उवरोहेणावि मज्झ गेहम्मि । दक्खिन्ननीरनिहिणो हवंति जेणेत्थ सप्पुरिसा ।।३९।। तो अणुमन्नियगमणो जा जाइ खणंतरं तमणुलग्गो । ता मुट्ठिपहारेणं झड त्ति पउणीकया खुज्जा ।।४०।।
___JainEducation International 2010_02
For Private & Personal Use Only
www.jainelibrary.org
