Agam 25 Prakirnak 02 Atur Pratyakhyan Sutra

SR No.: 002562
Original Sutra Author: Veerbhadra Gani
Author: Kirtiyashsuri
Publisher: Sanmarg Prakashan
Publication Year: 2010
Total Pages: 400
Language: Prakrit, Sanskrit, Gujarati
Classification: Book_Devnagari, Agam, Canon, F000, & F020
File Size: 11 MB

Page 159

११८
आतुरप्रत्याख्यानप्रकीर्णकम्
बहुगयघडच्छलेणं साइसयमहीहरत्तविजयंतं । सेवंति जं अथद्धं कुलगिरिणो विहियबहुरूवा ।।३।। सो पउमोत्तरराया तं पालइ जस्स सयलगुणकलिया । सावयधम्मम्मि दढा जाला नामेण वरभज्जा ।।४।। सीहसुमिणपरिकाहिओ विण्हुकुमारोत्ति ताण पढमसुओ । चउदससुमिणपिसुणिओ बीओ पुत्तो महापउमो ।।५।। विण्हू तत्थ निरीहो इयरो उ समीहए तओ रना । जुवरायत्ते ठविओ लहुओऽवि हु सो महापउमो ।।६।। एत्तो उज्जेणीए सिरिमुणिसुव्वयजिणस्स वरसीसो । सुव्वयनामायरिओ समागओ कहवि विहरंतो ।।७।। सिरिधम्मो नाम निवो वंदणहेउं समागओ तस्स । नमुई य नाम मंती तेण समं आगओ दुट्ठो ।।८।। तेण वितंडावाओ आढत्तो उवसमप्पहाणीए । पडिणीओत्ति य कलिउं मोणेण ठिओ खणं सूरि ।।९।। तेण भणि किमेसो आयरिओ जाणए बलीहो ? । गुरुपरिभवमसहंतो भणइ तओ खुडओ एक्को ।।१०।। नियऽगुरुययाए सुयणं खलो महंतंपि गणइ असमत्थं । निययसहावसरिच्छं जेण जणो पेच्छड् परंपि ।।११।। चिटुंतु ताव नीसेससत्यपारंगया इमे सूरी । जइ तुच्छ ! काइ सत्ती ता भणसु मएवि सह ताव ।।१२।। अह आढत्तो भणिउं निरुत्तरो खुड्डएण सो विहिओ । ता साहूसु पउट्ठो विलक्खवयणो गओ सगिहं ।।१३।। असमंजसाइं सुबहुं चिंतंतो उट्ठिऊण रयणीए । साहूण हणणहेउं सत्थं गहिउं गओ तत्थ ।।१४।। सम्मदिट्ठीए देवयाए तो थंमिओ तहिं चेव । दिट्ठो पभायसमए सपउरलोएण नरवएणा ।।१५।। तो आउट्ठो लोओ भत्तिं साहूण कुणइ सविसेसं । मुक्को नमुईवि य देवयाए लज्जाए नीहरिउं ।।१६।। अवयारत्थं साहूण चिंतयंतो उवायलक्खाइं । गंतूण हत्थिणउरे ओलग्गइ सो महापउमं ।।१७।। एसो राया जाओ काही मह वंछियंति बुद्धीए । मंतित्तं पडिवन्नो चिट्ठइ तस्सेव पासम्मि ।।१८।। एत्तो य महापउमस्स संतियं भंजए सयलदेसं । सिंहबलो नाम निवो बलेण दुग्गस्स कोट्टस्स ।।१९।। सो बंधिऊण गहिओ बुद्धीऍ नमुइणा तओ तुट्ठो । देइ वरं कुमरो से देज्जसु समयम्मि सो भणइ ।।२०।। अह अन्नया करावइ जालादेवी रहं जिणाययणे । तीए सवक्की लच्छी उ कारए बंभरहमेत्तो ।।२१।। बंभरहो नीहरिही पढमं लच्छीऍ पभणिओ राया । तं सोउं जालाऽविय कुणइ पइण्णं इमं तत्तो ।।२२।। गिण्हामि अणसणमहं जइ पढमं जिणरहो न नीहरइ । पउमुत्तरेण रन्ना तओ निरुद्धा रहा दोऽवि ।।२३।। माऊणं अवमाणं तं मन्नतो तओ महापउमो । नीहरिओ रयणीए एगागी अडविमणुपत्तो ।।२४।। तत्थ य हिंडंतेणं पत्तेणं सिंधुनंदणे नयरे । परिणीयं कण्णायं महसेणनिवस्स सयमेगं ।।२५।। वेगवईए विज्जाहरीए तत्तो य अवहरेऊणं । वेयड्डम्मि नगवरे सूरोदयपुरवरे नेउं ।।२६।।