Jambuchariyam

SR No.: 002554
Original Sutra Author: N/A
Author: Jinvijay, Chandanbalashree
Publisher: Bhadrankar Prakashan
Publication Year: 2009
Total Pages: 318
Language: Sanskrit
Classification: Book_Devnagari & Literature
File Size: 12 MB

Page 91

जंबुचरियम् पयंसइ । अओ एसा गाहुल्लिय'त्ति । तओ सिवकुमारेण भणियं-'वयंस ! जइ एवं ता जहा कुसुमाडोवो सफलो हवइ तहा अभिउत्तेण होयव्वं । नासो हरो य संपयं सयलो तुज्झ एसो' त्ति । इयरेण भणियं-'वीसत्थो चिट्ठ अवस्स वसंतस्स लच्छीए दंसणं सफलं करेमि । अहवा देवो चेव एत्थ अभिउत्तो'-'भवियव्वेसु घडइ नियमेण अन्नदीवगयं पि पाणियं' । ता एत्थ तुम्हेहि खेओ न कायव्वो त्ति । अन्नं च वच्च तुमं ताव सभवणं । अहं तीए पउत्तिं गवेसामि'त्ति । इमम्मि य भणिए चलिओ कुमारो सह सेसवयंसएहिं । पत्तो य पहाकरो लयाहरेसु गवेसिउं तं रायदुहियं । निसुयं च इमं सव्वं कणगवई-मयणमंजूसाहिं लयाहरंतरियाहिं । तओ भणियं कणगवईए- 'हला मयणमंजूसे ! का पुण धन्ना इमेण कुमारेण लिहिया चित्तफलहियाए ?, अहवा न सा धन्ना जा कमलिनि व्व चंदे इमम्मि न अभिरमेइ' । भणियमियरीए-'एवमहं लक्खेमि, जहा तुमं एत्थ महुमासूसवे अभिरममाणा दिट्ठा कहिं पि कुमारेण । ता तुमं चेवेत्थ लिहिय'त्ति । तीए भणियं-'कओ एत्तियाणि अम्ह भायधेयाणि?, तहावि जाव एयाओ सेसवयंसियाओ महुमासूसवआखित्तमाणसाओ अन्नत्थ चिटुंति ताव तुमं गंतूण तीए नलिणीए व्व नियरूयमयणमरट्टियाए विवरीयइत्थियाए गवेसणत्थवलियं कुमारवयंसयं पहाकरं निरूविऊण, तीए धन्नाए कुमारलिहियविलयाए उहं(दं)तं च लहिऊण सिग्घमागच्छसु त्ति । ममं पुण परायत्ता देहजट्ठी, थरहरइ हिययं, वेवन्ति ऊरुयाणि, उक्कंपणपरं नियंबयडं, परायत्ता य गमणया, अहिओ उवरिहुत्तो सीसो । अवि य
अइ दहइ चंदणरसो, हारो पज्जलइ अनिलउण्हाइ(ए) ।
दीवेइ कामजलणो, धूमाइ कुसुमरउक्केरो ॥१४०।। ता सव्वहा न समत्था अहं गंतुं, इमं च निसामिऊण पयट्ठा तुरियपयनिक्खेवं मयणमंजूसिया । समागया य थोववेलाए, पहट्ठवयणपंकया । वयणवियारेण य लक्खियं कणगवई[ए] जहा लद्धा तीए धन्नाए जुवईए भविस्सइ पउत्ती इमीए । भणियं च तीए-'पियवयंसिए ! परिच(च्च)य विसायं, अंगीकरेसु पमोयं, संपत्तं ते समीहियं सव्वं तं तहा, जहा मए भणियमासि' त्ति । इयरीए भणियं-'सच्चं सव्वं ?' तीए भणियं-'आमं'। कणगवईए भणियं-'कहं चिय ?' तीए भणियं-'गया अहमिओ ठाणाओ, दिट्ठो य सो मए, परियाणिया य अहं तेण तहा 'तीए