________________
५४
जंबुचरियम् सरिसेहिं पेरंततणुयतंवएहिं कसिणएहिं [नयणेहिं], संपुन्नमियंकसरिसेणं वयणकमलेणं, कंबुग्गीवसच्छभाए तिमेहलासंकिए निययचउरंगुलपमाणाए गीवाए, असोयपल्लवसरिसेहिं सुपसत्थरेहालंकिएहिं व करहिं, तिणिसलयासच्छभाहिं सुपइट्ठियाहिं वट्टसुजायकोमलतणुयंताहिं बाहूलयाहिं, आवट्टपीणुन्नयकलहोयकलससमाणेणं निरंतरेणं पओहरजुयलेणं, वित्थिन्नेणं वच्छत्थलेणं, लायन्नारुहणसोवाणभूयतिवलीसणाहेणं तणुयमज्झेणं, सहमिउकसिणरोमाए जहणपेसियाए व्व पओहरभारं, पवद्धणणिवारणगयाए विहूसिया रोमराईए, सयलतेलोक्कलाइन्नाइसयनिम्माणेणं नाहिमंडलेणं, वित्थिन्नएणं नियंबएणं, कयलीगब्भसुकुमालेणं निरंतरेणं च उरुजुयलेणं, पसंतसुकुमालाहिं अकयकुंकुमरायपिंजराहिं जंघाहिं, जलहरद्धत्थमियदिणयरबिंबसन्निभसणाहेहिं कुम्मुन्नएहिं चलणेहिं, रत्तुप्पलसन्निहेहिं पायतलेहिं ति । किं बहुणा ?
अंगोवंगपइट्ठियलक्खणपडिपुन्नसुंदरसरीरा।।
अंडो(दो)लाइ व हिययं, दिट्ठा नूणं मुणीणं पि ॥११७॥ तओ चिंतिउं पयत्तो । अवि य
किं एसा वणलच्छी, किं वा रइ मयणविरहिया होज्जा । जुवईनिम्मवणकए, पडिछंदो होज्ज किं विहिणो ॥११८॥ किं देवलोयभट्ठा, सावेण इमा तिलोत्तमा होज्जा ।
किं वा भुयणस्स सिरी, किं वा लच्छी वसंतस्स ॥११९।। अहवा जा होउ सा होउ । अहं पुण ताव, अवि य
दंसणमेत्तेणं चिय, विद्धो मयबाणतिक्खसल्लेहिं ।
जाव न वच्चइ जीयं, तावुप्पायं विचिंतेमो ॥१२०॥ ता पुण को एत्थ उवाओ ? अहवा जाणियं । अवि य
समुहं चिय गंतूणं, उभयकरालिंगियं इमं काउं ।
देहं मयणविदढे, विज्झमिमो फंससलिलेणं ॥१२१॥ अहवा न एवं । जओ
नियमित्ताणं पुरओ, इमीए सहियाण पायडं तह य । आलिंगणं कुणंतो, कह नाम न लज्जिओ होज्जा ॥१२२॥
Jain Education International 2010_02
For Private & Personal Use Only
www.jainelibrary.org
