Jambuchariyam

SR No.: 002554
Original Sutra Author: N/A
Author: Jinvijay, Chandanbalashree
Publisher: Bhadrankar Prakashan
Publication Year: 2009
Total Pages: 318
Language: Sanskrit
Classification: Book_Devnagari & Literature
File Size: 12 MB

Page 75

४२
जंबुचरियम् ___ तओ राइणा चिंतियं 'एवमेयं, सोहणं देवीए भणियं' । जेण भणियं च
__ "जस्स किर नत्थि पुत्तो विज्जाविक्कमधणस्स पुरिसस्स ।
सो तह कुसुमसमिद्धो फलरहिओ पायवो चेव" ॥८॥ [] तओ 'सव्वं सोहणं भविस्सई'त्ति भणिऊण विसज्जिया देवी । तओ तं दियह पभिइ सुयनिमित्तं कीरंति देवयाराहणाइं । विहिज्जंति मंततंतवाइयपूयाओ । निव्वत्तिज्जंति उवाइसयाइं, कीरंति बलीओ, बझंति रक्खाइं, पिज्जंति ओसहाई, दिज्जंति मूलियाओ, उवणिज्जति तंताई, एवं च कीरमाणेसु बहुएसु तंतमंतोवाइएसु, उववन्नो सो (से) तस्स उयरे । तओ गच्छंतेसु दियहेसु पवड्डिए गब्भे, जाओ सो जणणीए दोहलो 'जाणामि जइ समुद्दे मज्जामि' । इमं च नाऊण वइयरं वइरदत्तो राया समुद्दभूय(य) सीयं नाम महानइं गओ । तत्थ य जसोहरादेवी मज्जिया । अवगओ य दोहलो, निव्वुया य जाया । पसूयाय निययसमयेणं सुकुमालपाणिपायं दारगं । निवेइयं च राइणो वद्धावगेणं, दिन्नं च अंगच्छित्तं निवेयगस्स रन्ना, तयणंतरं च आणत्तं वद्धावणयं, वित्तं च महावद्धावणयं । पडिपुन्ने मासे, कयं तस्स दोहलगुणसंसूइयं नामं सायरदत्तो त्ति । तओ पंचधाईपरियरिओ पवडिओ देहोवचएणं कलाकलावेण य, संपत्तो य जोव्वणं । जणणिजणयकुसलत्तणेण जिणमयधम्मस्स पुव्वभवब्भासेण य जाओ सो जिणसासणभावियमई । तओ परिणाविओ पिउणा महासामंताणं रूवजोव्वणविन्नाणकलाकलावकलियाओ दारियाओ । तओ ताहिं समं अभिरममाणस्स सुहंसुहेणं गच्छइ कालो, वच्चंति दियहा । कयाइ जिणवंदणगीयवीणावायणेणं, कयाइ साहुपज्जुवासणेणं, कयाइ पहेलियाहिं, कयाइ अंतिमक्खराहिं, कयाइ वुड्डाहिं, कयाइ वि दुवईहिं, कयाइ पन्होत्तरेहिं, कयाइ अक्खरमत्ताबिंदुचुएहिं, कयाइ गूढचउत्थपाएहिं; एवं च सायरदत्तस्स विसयसुहमणुहवंतस्स वोलीणा अणेयदिवसकोडिलक्खा । अण्णया सव्वसत्तआणंदयारओ समागओ पढमघणसमओ । जो य केरिसो ? अवि य
धारावडणनिरंतसमंतओ भरियसलिलनिवहेण । निन्नुन्नया महीए, नज्जति नो जत्थ पहिएहि ॥९॥ अलिगवल[व]कुलअंजणतमालदलनीलिसरिसमेहेहिं । उच्छइयं गयणयलं, समंतओ गहिरसद्देहिं ॥१०॥