________________
॥ पंचमो उद्देसो ॥
इओ य सो तस्स भाया भवदत्तजीवदेवो ठिइक्खएणं चुओ समाणो, इहेव जंबुद्दीवे पुक्खलावइविजए अत्थि पुंडरिगिणी नयरी । जा य सा केरिसा ? अवि य
जणनिवहपूरपसरियजलोहदिप्पन्तरयणविच्छड्डा ।
मयरहरो व्व विसाला, पुहई इव सासया निच्चं ॥१॥ जत्थ य नयरीए
पच्च[य]लोवो जइ लक्खणम्मि सूएसु पंजरनिरोहो । कुसुमेसु बंधणं जइ, कंटो जइ कमलनालेसु ॥२॥ सिसिरविरमम्मि महुमाससेवणं पीलणं जइ तिलेसु । जीवेसु विग्गहो जइ, कलहो जइ मंडलग्गेसु ॥३॥ तत्थऽत्थि निययखग्गप्पहारनिज्जियपयंडरिउनिवहो । पणमियनरीसरकमो, चक्कहरो वइरदत्तो त्ति ॥४॥ तस्सासि सीलजोव्वणमणहरलायन्नरूवगुणकलिया ।
नियपाणाण वि दइया, नामेण जसोहरा देवी ॥५॥ सा य अपुत्ता, तओ विन्नत्तो सुयनिमित्तं तीए राया, जहा-'मम तणयणिमित्तं कुणसु देवयाईणं समाराहणं' ति । अन्नं च नत्थि देवस्स किं पि असझं । जओ भणियं च
"जाव य न दिति हिययं, गरुया विहडंति ताव कज्जाई ।
अव( वि )दिन्नं चिय हिययं, गुरुं पि कज्जं परिसमत्तं" ॥६॥[ ] "तिणमेत्तं पि हु कज्जं, गिरिवरसरिसं असत्तिमंताणं । होइ गिरी वि तिणसमो, अहिओगसक्कसे पुरिसे" ॥७॥ [ ]
Jain Education International 2010_02
For Private & Personal Use Only
www.jainelibrary.org
