Jambuchariyam

SR No.: 002554
Original Sutra Author: N/A
Author: Jinvijay, Chandanbalashree
Publisher: Bhadrankar Prakashan
Publication Year: 2009
Total Pages: 318
Language: Sanskrit
Classification: Book_Devnagari & Literature
File Size: 12 MB

Page 69

३६
जंबुचरियम् सुओ महिसत्तणेण उववन्नो भारं वहमाणो । तओ करुणाए सुयसिणेहेण य पडिबोहत्थं समागओ सो देवो । कओ तेण दिसावाणियगवेसो, विउव्विओ सयडसत्थो । अत्थं दाऊण तस्स सामिणो गहिओ सो तेण महिसो, जुत्तो य गुरुभारसयडे । देवसत्तीए विउव्विओ महाभारो । तओ जाहे न सक्केइ परिवोढुं ताहे सो तोत्तयलउडप्पहारं दाऊण
अन्नत्तो जणगरूवं विउव्वित्ता एवं भणइ, जहा-'खंत ! न सक्केमि पढमालियाए विणा विरसं उवभुंजिउं, जाव अगारीए विणा न तरामि अच्छिउं' ति एवं भणमाणो य पुव्ववुत्तंतं साहिउं पयत्तो सो देवो । एयं च सुणमाणस्स तं च जणयरूवं देवं पलोएमाणे समुप्पन्नो तस्स महिसगस्स चित्ते वियप्पो ‘कत्थ मन्नेइ एवं (मन्ने एयं?) दिट्ठपुव्वं मया, अणुहूयं च इमं जं एसो साहेइ' । एवं च ईहापोहमग्गणगवेसणं कुणंतस्स तस्स तयावरणिज्जकम्मखओवसमेण जायं जाइस्सरणं । तेण जाणिओ पुव्वभवो, नाओ वुत्तंतो, संविग्गो चित्तेण विरत्तो संसारस्स, अवगओ तिव्वमोहो । तओ एवं चिंतिउ पयत्तो-'अहो दुरन्तो एस संसारो, चलाई चित्ताई, चंचला इंदियतुरंगमा, विसमा कम्मगइ, न सुंदरं मए अणुट्ठियं, अहमा तिरियजोणी, दुल्लहो जिणवरमग्गो; ता सव्वहा जं एस जणगो भणइ तं मए कायव्वं' ति । एवं चितिऊण भणियं तेण हियएण निययभासाए जहा-'भयवं ! किं मए संपयं समायरियव्वं ?' । तओ देवेण जाणिऊण तस्स भावं जहा-'एस संपयं पडिवज्जइ जिणवरमग्गं' ति तओ पयडियं अत्ताणं देवेण कया य धम्मदेसणा, कहियं च जहा-'गओ अहं देवलोयं' महिसगस्स । तओ सो महिसो गहियअणुव्वओ कयभत्तपच्चक्खाणे सुहज्झाणोवगओ य अणसणनमोक्कारेण य तइयदियहे मरिऊण उववन्नो सोहम्मे कप्पे देवत्ताए त्ति । देवो वि गओ नियट्ठाणं ति ।
ता एवंविहा इमे दुरन्तलक्खणा विसया विसज्जणीया जिणमयकुसलेण जंतुणा । अवि य- ता मा तुमं पि जह सो, तिरियत्ते पाविओ महादुक्खं ।
भोगपिवासानडिओ, पाविहिसि अणेयसो दुक्खं ॥८४॥ विसयासत्ता य नरा, पडंति बीभत्स(च्छ)भीसणे नरए । साहूहि जेण भणियं, फुडवियडत्थं निसामेह ॥८५॥ "अच्छड्डियविसयसुहो, पडइ अविज्झायसिहिसिहानिवहे । संसारोवहिवलयासुहम्मि दुक्खागरे घोरे ॥८६॥