________________
जंबुचरियम् अहवा न हि न हि एवं, मयस्स गुरुपावपुंजमलिणस्स । होही पुणो वि जम्मो, एयाओ चेव पावयरो ॥७१॥ ता देवं देवेणं, तित्थं तित्थेण हायमाणो हं । पक्खालितो पावं, भमामि दइयाए परिहीणो ॥७२॥ धणमाणविप्पमुक्का, धणियपहीणा जणम्मि जे पुरिसा ।
ताण सरणं वि एसो, वणं व लोए न संदेहो" ॥७३।। तओ एवं च चितिऊणं ताओ धूयाओ दाऊण माहणदारगाणं किल गहियकन्नाहलो संचलिओ सुएण सह तेण तित्थयत्ताए त्ति । तओ एवं च सह तेण डहरगदारएणं परिभममाणेण तित्थं तित्थेण रेवाइच्चमाहणेणं लहुयत्तणेण कम्मस्स, थोयत्तणेणं संसारस्स, भव्वत्तणेण तस्स जीवस्स, अणुदएण मिच्छत्तस्स, भवियव्वाए सम्मत्तस्स पत्ता साहवो, निसुओ धम्मो, गहियं सम्मत्तं, उवसामिया कसाया, गहियं वयं सह तेण दारगेणं ति । एवं च कुणइ तवं पालेइ संजमं, चरइ चारित्तं, वच्चंति दियहा, गच्छति कालो । सो वि दारगो संपत्तजोव्वणो वाहिज्जमाणो इंदिएहिं, अचयंतो सोढुं परीसहे, संतो महव्वयगुरुभरभारजावजीववहणेणं, वाहिज्जमाणो निययसंकप्पसमुब्भवेणं कामदेवेणं, अचयंतो वोढुं संजमतवनियमकिरियाकलावं संजमं पइसिउं पयत्तो त्ति । पत्थइ य जइयणविरुद्धाइं, कुणइ य उम्मग्गं । तओ पालिज्जंतो वि पयत्तनयणाए साहूहि विसए पत्थिउं पयत्तो, भणइ य-'खंत ! अविरइयाए विणा न पारेमि अच्छिउं । तओ निद्धम्मो त्ति काउं 'अजोग्गो एस जिणपवयणपव्वज्जाकिरियाए' त्ति परिचत्तो साहहिं । तओ पच्चलयाए अजसोदयस्स, बाहुल्लेणं अविरईए, उदएणं रागदोसाणं, पभूययाए असायोययस्स परिचत्तं विरइरयणं ति । पत्तो गिहत्थकरणीए । तओ विसयनिमित्तं किं काउमाढत्तो? अवि य
उदयं कटुं च तिणं, वहेइ सीसेण भोयतण्हालू । अजगोवसहमहीसीण पालणं तह समायरइ ॥७४॥ एवं सियवायधुओ, गिम्हायवताविओ छुहाकंतो । जं जं कुणइ वराओ, तं तं चिय निष्फलं तस्स ॥७५॥
Jain Education International 2010_02
For Private & Personal Use Only
www.jainelibrary.org
