________________
चउत्थो उद्देसो
रुक्खो पंडरदेहो, पिंगलनयणो जलंतरोमचओ। तम्मि य रेवाइच्चो, नामेणं माहणो आसि ॥६४॥ तम्मि धणकणयजुत्ते, नियविहवोहसियधणयरिद्धिजणे ।
दालिद्दकंदली जम्मदुक्खिओ सो परं एक्को ॥६५॥ तस्स य आवया नाम गुरुबंभणविदिन्ना जन्नपत्ती भट्टिणी अहेसि । सा य केरिसा? अवि य- उट्ठविणिग्गयदसणा, पिंगलनयणा लडंतगुरुथणया ।
लंबोयरवंकमुहा, मडहा किण्हा य वन्नेण ॥६६॥ सा य तस्स अईव दुवि(व्वि)णीया भसणसीला वंचणपरा कलहपिया झंखणसहावा उव्वेवजगया अवन्नवायपरायण त्ति । एवंविहाए य तीए भट्टिणीए तेण माहणेण जायाओ पनरसदारियाओ, ताणं च एक्को कणिट्ठो दारओ । तओ सो तेण कुटुंबेण राई दियहं च भक्खणपरेणं ओभूरभविस्समेत्तविज्जो जायणामेत्तलद्धेण अनित्थारयंतो अत्ताणयं सह तीए माहणीए विक्किणेइ दारयं हारए, वहेइ उदयं, कुणइ खंडणं, समायरइ पीसणं, छड्डेइ छाणगं, भमेइ भिक्खं ति । भणियं च
"वंसि चडंति धुणंति कर, धूलीधोया हुंति ।
पोट्टह कारणि कापुरिस, कं कं जं न कुणंति" ॥६७॥ [ ] एवं च सह तीए एरिसं विसयसुहमणुभवंतस्स वच्चए कालो, गच्छंति दियहा । अन्नया य मरणतयाए जीवलोगस्स उवरया सा आवया भिहाणा तस्स भट्टिणी घरिणी। तीए य मयाए सो सुन्नो इव चुन्नो इव हयहिययो इव गहगहिओ इव परायत्तचित्तो इव मूढो इव सव्वहा किंकायव्वदिन्नवावारहियओ जाओ । तओ चिंतिउं पयत्तो । __ अवि य- "अत्थो कामो धम्मो, पुरिसत्था तिन्नि हुंति लोयम्मि ।
एएहिं विरहियस्स य, होइ निरत्थो नवर जम्मो ॥६८॥ एयाणं पुण मज्झे, नत्थि अउन्नस्स मज्झ एक्को वि । ता पयपूरणमेत्तेण किं मम एएण जम्मेण ॥६९।। ता सव्वजंतुपरिनिदियस्स मम संपयं अउन्नस्स । पियपणइणिरहियस्स य, मरणं सेयं परं एक्कं ॥७०॥
Jain Education International 2010_02
For Private & Personal Use Only
www.jainelibrary.org
