Jambuchariyam

SR No.: 002554
Original Sutra Author: N/A
Author: Jinvijay, Chandanbalashree
Publisher: Bhadrankar Prakashan
Publication Year: 2009
Total Pages: 318
Language: Sanskrit
Classification: Book_Devnagari & Literature
File Size: 12 MB

Page 58

चउत्थो उद्देसो
जइ परदव्वनियत्ती, न य परतत्ती सरीरगुत्ती य । जइ सुद्धभिक्खवित्ती, न पवित्ती संचए जइ य ॥१७॥ जइ सद्देसु न रज्जइ, रसेसु गंधेसु तह य फासेसु । विसएसु न वि य रज्जइ, न वि मज्जइ कुलबलाईसु ॥१८॥ जइ उवसमो जइ दमो, जइ नियमो जइ य होइ वेरग्गं । जइ साहुपूयणरओ, जइ निरओ होइ सज्झाए ॥१९॥ एमाई धम्मगुणा, जस्सत्थि जयम्मि तस्स धम्मो हि ।
एयगुणविप्पहीणो न होइ धम्मो अहम्मो सो" ॥२०॥ एवं च गुरुणा कहिए तओ धम्मं सोऊण पडिबुद्धो भवदत्तो पव्वइओ य । विहरिओ य गुरुणा सद्धिं । अन्नया य कयाई आयरिया विन्नत्ता एक्केण साहुणा, जहा-'इच्छामि तुब्मेहिं अणुन्नाओ सयणाणं सयासं गंतुं । तत्थ य ममं दद्रुण कणिट्ठो भाया अईवसिणेहसंबद्धो सो य कइया पव्वि[व्व]यइ त्ति । तओ विसज्जिओ बहुसुयसाहुसमेओ सो गुरुणा । तओ दट्ठण य नायए समागओ थोवदियहेहिं । तओ तेण गुरूणं समालोइयं, जहा तस्स अम्मपियरेहिं वरिया दारिया अओ सो न पव्व[इ]उ त्ति । एयं च सोऊण [भणियं-] भवदत्तसाहुणा-'एसो वि नाम किल सिणेहो जं तुमं पि भाउयं धम्मसारहिं चिरस्स दट्टणं पि न सो पव्वइओ' त्ति । इमं च सोऊण भणियं तेण साहुणा-'तुम्ह वि अत्थि कणिट्ठो भाया, तुमं पि तत्थ गए पेच्छिस्सामो तं पव्वइयं' ति । तओ भणियं भवदत्तेण-'जइ भयवओ आयरिया तमुद्देसं गमिस्संति, तओ सो ममं दट्ठण कयाइ जइ पव्वइय' त्ति । गुरुणा य सद्धिं विहरमाणस्स भवदत्तसाहुस्स वच्चइ कालो । अण्णया य कयाई विहरमाणा आयरिया गया मगहाजणवयं । तत्थ वि सुगामासन्नगामं । तओ विन्नविया आयरिया भवदत्तसाहुणा, जहा- 'भयवं ! तुब्भेहिं अणुण्णाओ इच्छामि दटुं सयणे' त्ति । तओ गुरुणा वि सुसाहुसमेओ विसज्जिओ सो, पत्तो य सुगामं । इओ य तम्मि समए सो भवदेवो तस्स भाया नागदत्तस्स कुलउत्तस्स लच्छिमईए भारियाए धूया नाम नाइला, तीए सह विवाहमंगलनिमित्तं आरूढो वेईमंडवे पगहियकरो करेण भमइ मंडलाइं त्ति । एयम्मि य समए पविट्ठो भवदत्तसाहू तेसिं गेहे । तओ तं दट्टण परितुट्ठा सव्वे सयणबंधवा । तओ कयमुचियकरणीयं, वंदिया य भगवंतो साहवो तेहिं,