________________
तइयो उद्देसो
नीहरमाणेण तओ दिट्ठो झाणन्तरम्मि वढ्तो ।
नयरस्स बाहिरीए, पसन्नचंदो नरिंदेण ॥४२॥ सो य केरिसो दिट्ठो ? । अवि य
बीयाससि व्व तणुओ तवसंजमचरणकरणनियमेहिं । उवसंतसोममुत्ती पडिमत्थो कि पि झायंतो ॥४३॥ गंतूण तं मुणिंदं काऊण पयाहिणं च तिक्खुत्तो । भत्तिभरनिब्भरंगो एवं थोउं समाढत्तो ॥४४|| "जय ! नेहनियलमूरण, जय ! तवखग्गग्गनिहयकम्मरिऊ । जय ! नीसंग महाजस, जय ! लोइयमुक्कवावार !" ॥४५॥ थोऊणेवं राया नमिऊणं पायपंकयं सिरसा । मुणिणा अदिन्नवयणो, चिंतेउं एवमाढत्तो ॥४६॥ एसो महाणुभावो महइमहन्तम्मि वट्टए झाणे । मोक्खेक्कदिन्नचित्तो तडट्ठिओ लोयजत्ताए ॥४७॥ एसोऽवस्सं साहइ मोक्खं अचिरेण नत्थि संदेहो । अहवस पढमपुच्छा अज्जं मम जिणसयासम्मि ॥४८॥ जं एसो परममुणी वढ्तो दुक्करम्मि झाणम्मि । एत्थ समयम्मि वीरो किल साहइ कं गई अमलो ॥४९॥ एवं विचिंतिऊणं नरनाहं(हो) तं मुणिं पसंसंतो । पत्तो य समोसरणं बहुदेवसहस्सपडिपुन्नं ॥५०॥ दुंदुहिरवगज्जंतं सुरमउडफुरंतपयडविज्जुलयं । जणमणपूरियआसं बहुजंतुसहस्सपडिपुन्नं ॥५१॥ पायाररयणविप्फुरियकिरणआबद्धपयडसुरचावं । पाउससमउ व्व सुहं गंधोदयसुरहिपवणिल्लं ।।५२।। अह तम्मि पविसिऊणं काऊण पयाहिणं जिणिंदस्स । भत्तिभरनिब्भरंगो एवं थुणिउं समाढत्तो ॥५३॥
Jain Education International 2010_02
For Private & Personal Use Only
www.jainelibrary.org
