________________
॥ तइयो उद्देसो ॥
सुरसेलकंदनालं पुहईधरपवरकेसरभिरामं । भरहाइदलं विउलं दिव्वोसहिसुरहिमयरंदं ॥१॥ लवणोव(द)हिपरिखित्तं जणमहुयरसेवियं सयाकालं । कुमुयं व जंबुदीवं, मज्झे लोयस्स अत्थत्थि वरं ।।२।। तस्स य दाहिणभाए अवसप्पिणि-इयरपयडदोपक्खं । उदुवइदलं व भरहं, वेयड्डससंकियं अत्थि ॥३॥ तस्सत्थि दाहिणद्धे मज्झिमखंडम्मि जणवओ मगहा ।
सुरलोयसमो रम्मो जो उववणदेवभवणेहिं ॥४॥ जहिं च- गामा सरेहिं नलिणीहिं सरवरा पउमिणीउ पउमेहिं ।
भमरेहिं पउमसंडा अली विरुइएण रेहति ॥५॥ तियमेहलसुविहत्तं चउक्कवत्तादिवरसिलसमेयं । तुंगट्टालयसिहरं परिखित्तं नंदणवणेण ॥६॥ वरकणयमयं तुंगं अणेयसुरभवणचूलियसमेयं ।
तत्थऽत्थि पुरं पयडं, रायगिहं मेरुबिंबं व ॥७॥ तं च केरिसं?- आरामवाविदीहियगोउरपायारतोरणसणाहं ।
बहुवण्णजाइसिप्पियजणनिवहुद्दामरमणिज्जं ॥८॥ वेला इव जलनिहिणो मुत्ताहलरयणसंखसिप्पीहि । रेहति विद्रुमेहि य आवणमग्गा जहिं नयरे ॥९॥
Jain Education International 2010_02
For Private & Personal Use Only
www.jainelibrary.org
