________________
२४०
जंबुचरियम् निंदंतो संसारं पसंसमाणो य जिणमयं धम्मं । पालितो सामण्णं अहिज्जमाणो य सुयधम्मं ॥६०३॥ किं बहुणा भणिएणं कज्जाकजं हियाहियं [नि]यमं । विहरइ वियाणमाणो अवसेसियकम्ममलमुक्को ॥६०४।। सामाइयाइयाइं (आयारमाइयाइं) बारसअंगाइं जंबुणामेण । गहियाइं थोवदियहेहिं भयवया सुत्तअत्थेण ॥६०५।। जाओ चोद्दसपुव्वी गुरुणा विय ठावियो गणिपयम्मि । पभवो वि य से सीसो अह दिन्नो गणहरिंदेणं ॥६०६।। "निक्खिविऊणं गच्छं गणहारी जंबुसामिणो ताहे । नित्थिन्नभवसमुद्दो निप्फाइयसीसगणनिवहो ॥६०७॥ निट्ठवियअट्ठकम्मो पडिबोहियभव्वजंतुकमलवणो । केवलनाणदिवायरसुरनरदेविंदपणिवइओ ॥६०८॥ भुयणाभोयपइट्ठियअसेससब्भूयभावभावन्नू । केवलपईवपयडियभव्वाणं पुनपावफलो ॥६०९॥ सव्वजयजंतुपरमेक्कबंधवो तिहुयणेक्कपरमगुरू । जयसरणं पाणिह हि)ओ परमाणंदो य भव्वाणं ॥६१०॥ केवलिपज्जायं विहरिऊण भवगाहिकम्मुणा मुक्को । भयवं सुहम्मसामी सिवमयलमणुत्तरं पत्तो" ॥६११॥ भयवं पि जंबुसामी गोयमपयविमलपालणेक्करओ । सयलगणसंपरिवुडो दंसणचारित्तनाणधरो ॥६१२।। परिविहरिओ य वसुहं गामागरनगरकव्वडसणाहं । सारयससि व्व सययं बोहिंतो भव्वकुमुयाइं ॥६१३।। नाणाविहदेसेसुं एवं सफलं च विहरमाणस्स । निव्वूढो बहुकालो जाया सीसाण निप्फत्ती ॥६१४॥ "अह अन्नया कयाई धम्मज्झाणंमि निच्छियमइस्स । परिभाविन्तस्स सुयं जीवसरूवं गुणितस्स ॥६१५॥
Jain Education International 2010_02
For Private & Personal Use Only
www.jainelibrary.org
