________________
२३९
सोलसमो उद्देसओ
पंचसमिओ तिगुत्तो पंचमहन्वयधरो य तं होसु । पडिपुन्नसंजमधरो अट्ठारससहस्ससीलंगो ॥५९१॥ भावेसु भावणाओ बद्धसु किरियाकलावनियरेण । निद्दहसु कम्मकिट्टे पच्छा सिद्धि पि पावेसि ॥५९२॥ एयं निसामिऊणं भयवं रोमंचकंचुओ जंबू ।
गुरुचलणेसु नओ सह पभवाईहिं [च] साहूहि ॥५९३॥ तओ भणियं जंबुसामिणा । अवि य-जं जं चिय कायव्वं भगवं तं तं च अम्ह तुम्हेहिं ।
आणवणीयं सव्वं सेसं पडिसेहियव्वं ति ॥५९४॥ एवं ति तओ भणिए गुरुणा वि य गणहरिंदचंदेण । चलणपणामं काऊण उट्ठिओ जंबुसामि त्ति ॥५९५।। कोणियपमुहेहिं तओ नमिओ सामंतनायरजणेहिं । कुणमाणा य पसंसं नरवइपमुहा गया नयरं ॥५९६॥ तक्कालियं च किरियं गुरुणा वि य जंबुसामि कारविओ। धारिणिपमुहाओ वि य ताओ सयलाओ अज्जाओ ॥५९७॥ गुरुणा समप्पियाओ विहिपुव्वं जेट्ठमयहरज्जाए ।
तप्पभिई चिय भयवं गुरुणा सह विहरिओ जंबू ॥५९८॥ कह ? अवि य
कायव्वाइं कुणंतो अकुणंतो तह य वज्जणीयाइं । भणियव्वाइं भणंतो[य] अभणियव्वाइं अभणंतो ॥५९९॥ वज्जितो य अगम्मे समायरंतो य तह य सो गम्मे । भुंजंतो भक्खाई अभुंजमाणो अभक्खाइं ॥६००॥ पेयाइं अह पियंतो अपियंतो तह य सो अपेयाइं । इच्छंतो इट्ठाई वज्जितो तह अणिट्ठाइं ॥६०१॥ सोयव्वाइं सुणतो असुणंतो तह विरुद्धवयणाइं। आएयं गिण्हंतो उवेक्खणीए उवेक्खंतो ॥६०२॥
Jain Education International 2010_02
For Private & Personal Use Only
www.jainelibrary.org
