________________
२३३
सोलसमो उद्देसओ
धणओ व्व पूरमाणो दविणमहासंचएण पणइयणं । कोणियनरनाहेणं सहिओ य अणाढियसुरेण ॥५१५॥ दूराओ अवयरिया सव्वे वि य जाणवाहणाहितो । गुणसिलए अह पत्ता जिणिंदभवणे मणहरम्मि ॥५१६॥ नमिऊणं तत्थ जिणं सुहम्मसामि च वंदिउं सव्वे । उवविठ्ठा गुरुमूले नरिंदपमुहा महियलम्मि ॥५१७।। नमिऊण पायकमलं सुहम्मसामिस्स जंबुणामेण । निजपरियणसहिएणं भणिओ एवं सहरिसेणं ॥५१८॥ जम्मणमरणपरंपरनारयतिरिमणुयदेववासाओ । बहुगब्भसंकुलाओ भयवं संसारवासाओ ॥५१९॥ जिणदिक्खादाणेणं इमाओ बहुदुक्खसंकडिल्लाओ । उत्तारेसु अणाहं सयणेण समं इमं धीर ! ॥५२०॥ भणियं सुहम्मगुरुणा एवमविग्घं ति मा चिरावेसु । किच्चमिणं भवियाणं अवगयसंसारभावाणं ॥५२१॥ अह कोणियनरवइणा भणिओ जंबू पसन्नवयणेण । आइससु धीर ! इहि जं कायव्वं मए किंचि ॥५२२॥ पंचसयचोरसहिओ समागओ अह इमंमि पत्थावे । पभवो नरनाहसुओ नमिओ य गुरूण चलणेसु ॥५२३॥ जंबुकुमारेण तओ भणियं नरनाह ! खमसु एयस्स । पभवकुमारस्स तुमं अवरद्धं किं पि जमिमेण ॥५२४॥ अज्ज रयणीए एसो समागओ चोरीयाइ मम गेहं । तत्थ मए उवसमिओ सामण्णं गिण्हिही एसो ॥५२५॥ नरनाहेणं भणियं कुणसु अविग्घेण एस सामण्णं । खमियं सव्वं पि मए एयस्स महाणुभावस्स ॥५२६।।
___Jain Education International 2010_02
For Private & Personal Use Only
www.jainelibrary.org
