________________
२०९
सोलसमो उद्देसओ
न कयाइ अप्पयाणं कायव्वं निच्चमेव वोढव्वं । एएण नवर विहिणा खिप्पं लंघिज्जए अडवी ॥२४०॥ पाविज्जइ अच्चंतं गंतुं दोगच्चसयलपरिहीणं । सव्वुत्तमसुहवसहिं सिग्धं चिय सिवपुरि ताहे ॥२४१॥ तत्थ न जरा न मच्चू न वाहिणो नेय सयलसंतावा । अच्चंतव्वाबाहं होइ सुहं सयलकालं पि ॥२४२।। एवं च तेण सिढे उच्चलिया के वि सरलपंथेण । अन्ने पुण ऽन्नयरेण तेण समं पंथिया बहवे ॥२४३।। पुरओ य वच्चमाणा मग्गं दावेइ सयललोयाणं । संलिहइ अक्खरेहि सिलासु पंथस्स दोस-गुणा ॥२४४॥ एवं जे तेण समं सयलसमाएसकारिणो चलिया । ते तेण समं पत्ता अचिरेणं तं पुरिं पवरं ॥२४५॥ पाविति ते वि नूणं जे च्चिय गच्छंति तस्स मग्गेण । लिहियं अणुसरमाणा दोसे वज्जेंति जत्तेण ॥२४६॥ जे उण तस्सुवएसे न वट्टिया नेय वट्टइस्संति । वटुंति नेय अहुणा ते न य पत्ता न पाविति ॥२४७॥ दव्वाडवीए एवं संपइ भावाडवीए जोडेमि । एयं चिय अक्खाणं संखेवेणं जडा कमसो ॥२४८॥ "जो तज्झ सत्थवाहो सो तिहुयणेक्कदिवसयरो । केवलपईवपयडियपरमत्थपयत्थवित्थारो ॥२४९॥ जम्मजरमरणसलिले मिच्छत्ताविरइदूरपायाले । भीसणकसायवत्ते दुल्लंघे सोमगंभीरे ॥२५०॥ रागद्दोससमीरणविक्खोभियवीई(विइ)तरंगकल्लोले । सोगाइदुट्ठमच्छे संजोगविओगविक्खोभे ॥२५१।।
Jain Education International 2010_02
For Private & Personal Use Only
www.jainelibrary.org
