________________
२०८
जंबुचरियम् रुक्खा य तत्थ एगे मणोरमा बहलपत्तलच्छाया । तेसु न वीससियव्वं छाया वि य मारए तेसिं ॥२२८॥ परिसडियपंडुपत्तेसु नवर रुक्खेसु वीसमेयव्वं । एक्कं तत्थ मुहुत्तं पुणो वि पंथंमि गंतव्वं ॥२२९|| बहवे य तडनिविट्ठा रूवस्सी तह य महुरवाया य । सदंति तत्थ पुरिसा तेसिं वयणं न सोयव्वं ॥२३०॥ मोत्तव्वा न सहाया खणं पि एगागिणो अवस्सभयं । अत्थि दुरंतो य तर्हि पंथंमि दवानलो घोरो ॥२३१॥ जयणाए सो दवग्गी पमायरहिएहिं वेझवेयव्वो । अणविज्झाणो नियमा पज्जलिऊणं डहइ पुरिसं ॥२३२॥ पुरओ वि तुंगसेलो पमायरहिएहिँ सो विलंघेव्वो । नियमेण होइ मरणं तमलंघताण पुरिसाण ॥२३३॥ पुरओ वि कुडिलगुहिरा वंसकुडंगी पयत्तजुत्तेहिं । लंघेयव्वाऽवस्सं बहवे अविलंघणे दोसा ॥२३४|| खड्डोलओ य तुच्छो तस्स समीवे मणोरहो नाम । अच्छइ निच्चुवविट्ठो पूरेह इमं भणइ विप्पो ॥२३५॥ सो य न पूरेयव्वो पूरिज्जंतो य जाइ वित्थारं । पंथस्स य पलिभंगो वयणं पि न तस्स सोयव्वं ॥२३६॥ अत्थि पुणो दिव्वाइं किंपागफलाइं सुरहिपिक्काइं । जीयहराई फलाई ताई पि विवज्जणीयाई ॥२३७॥ घोरा महाकराला अत्थि पिसाया य तत्थ बावीसं । निच्चं चिय गसणपरा जेयव्वा ते पयत्तेण ॥२३८॥ विरसं च भत्तपाणं भुंजेयव्वं च जाइडं निच्चं । वोढव्वं दो जामे रयणीए पच्छिमे पढमे ॥२३९।।
Jain Education International 2010_02
For Private & Personal Use Only
www.jainelibrary.org
