Jambuchariyam

SR No.: 002554
Original Sutra Author: N/A
Author: Jinvijay, Chandanbalashree
Publisher: Bhadrankar Prakashan
Publication Year: 2009
Total Pages: 318
Language: Sanskrit
Classification: Book_Devnagari & Literature
File Size: 12 MB

Page 219

१८६
जंबुचरियम् अवि य- नरनाह ! देसु कन्नं सुव्वउ अक्खाणयं जमिह वित्तं ।
मा गव्विउ त्ति होउं परिभवसु मए तुमं बालं ॥४॥ जओ- बालो वि सुइसयन्नो आएओ होइ बुद्धिमंताण ।
विद्धो वि होइ हेओ सत्थत्थविवज्जिओ पुरिसो ॥५॥ तओ इमं च निसामिऊण राइणा गरुयविम्हयखित्तमाणसेण-अहो ! पेच्छ इमाए बुद्धिकुसलत्तणं कुमारीए निक्खोभत्तणं च । मम अत्थाणमंडवपुरओ कह सललियक्खरगिराए एसा परिजंपइ-त्ति चिंतिऊण भणिया सा राइणा-'न तुमं बाला जीए ते एरिसो वायाविहवो । ता उवउत्तो अहयं परिकहसु' त्ति ।
तीए भणियं । अवि य- तुह गुरुविक्कमपसरियजसनिवहदियंतपत्तनियनामा ।
अत्थि इमा वरनयरी मणिकंचणरयणसंपुन्ना ॥६॥ इमीए वाणारसीए नयरीए अत्थि एगो नागसम्मो नाम चक्कयरो दालिद्दकंदली सयलसुइपरिहीणो । माहणमित्तवेसधारी बि(दि)ओ । सोमसिरी नाम से भज्जा । अहयं च तेसिं धूया । कुमारी अहं । अन्नया य ममं जोव्वणभरे वट्टमाणे दट्टण ताओ गहिओ चिंताए, जहा को इमीए होही वरो । इमंमि य अवसरे समागओ एक्को बडुओ परिब्भममाणो मेइणिमंडलं कस्स वि देसंतराओ अम्ह गेहं । दिन्ना य अहं तस्स समागयबडुयस्स । तओ तंमि चेव दिणे ताओ सह अंबाए मम विवाहनिमित्तं गओ जायणत्थं परिभमणियाए । ममं तं च बडुगं मोत्तूण गेहे । तओ मए चिन्तियं-एयस्स मम दइयस्स कह मए चित्ताराहणं कायव्वं । अहवा उज्झिऊण लज्जं पोढमहिला इव सव्वमुवयारं निव्वत्तेमि त्ति । तओ निव्वत्तियं मए ण्हाणभोयणाइयं सयलं पि तस्स करणीयं । समागया य जामिणी । निव्वत्तियं पुणो वि मए सव्वं तस्स संझायालकरणीयं । अम्ह गेहे एगा चेव खट्टा अत्थुरणगं च । अत्थुरिया य सा मए तस्स । नुवन्नो य सो मम दइओ । मया वि परिचिंतियं अहं पि इत्थेव नुवण्णामि । मा भूमीए पसुत्ताए अन्नो को वि अणत्थो अहिमाईजणिओ भविस्सइ । न य को वि एत्थ तहाविहो अन्नो अत्थि जो ममं एत्थ पसुत्तं दच्छिही । तओ इमं च परिचिंतिऊण तम्मि तस्स सयणीए पसुत्ता अहं । तओ मए हावभावविब्भममयणवियारेहिं कओ सो अवहियहियओ। जाव कामवियारं पयंसिउं पयत्तो ।