________________
पनरसमो उद्देसओ
१८३ अन्नेहिं वि भणियं
"असढहियओ सलज्जो, सुसहावो वच्छलो कयन्नू य । विहलुद्धरणधणो वि हु, मित्तो इह होइ धन्नाण" ॥४७॥ [ ] ता मज्झ एस सहलो, जम्मो अब्भत्थिओ जमिह सुयणु ! ।
ते आवइपत्तेणं, दुल्लहअब्भणेणेत्थ ॥४८॥ भणियं च- "उक्कत्तिऊण कवयं, दिन्नं कन्नेण तियसनाहस्स ।
सप्पुरिसपत्थणा जे, करिन्ति ते दुल्लहा हुंति" ॥४९॥ [ ] ता परिमुंच विसायं, पयट्ट सिग्धं तु जत्थ गंतव्वं । अह दो वि ते पयट्टा, पत्ता य जहिच्छियं ठाणं ॥५०॥ दिट्ठो य तस्स राया, कओ पसाओ य तेण मंतिस्स । मंतिपयंमि निउत्तो, जाया ते दो वि सुहभाई ॥५१॥ ता एसो दिटुंतो, कहिओ भे अबुहबोहणनिमित्तं । एयस्स उवणयमिमं, सुण इण्हि तं विसालच्छि ! ॥५२॥ "जह नरवइस्स कोवो जं नृणं होइ तह य इह मरणं । जारिसओ सो मंती तारिसओ होइ पुण जीवो ॥५३॥ जो ण्हाणपाणभोयणवत्थसमालभणलालिओ मित्तो।
आवइकालविलोट्टो सो देहो इह [य] नायव्वो ॥५४॥ जओ- सेज्जासणसंवाहणवत्थसमालिहणण्हाणकुसुमेहिं ।
वेल्लहलविलयकोमलबाहुलयालिंगणेहिं च ॥५५॥ विविहवरपाणभोयणसुयंधतंबोलसुरयदुल्ललिओ। मरणंतं पि निहीणो विलोट्टए एस हयदेहो ॥५६॥ एक्कं पि पयं गंतुं जीवेण समं न होइ एस खमो । तम्हा एयस्स कओ अकयत्थो होइ उवयारो ॥५७।। जो पुण ऊसवमित्तो सो सयणो माइपुत्तवग्गो य । जाया जणओ य तहा नायव्वो बुद्धिमंतेहिं ॥५८॥
Jain Education International 2010_02
For Private & Personal Use Only
www.jainelibrary.org
